ILP jeh-a Manipur a boina meikou bang!

Tukum ILP thu jeh-a Manipur thilsoh hi Leiset aum laise a kiseimang talou ding ahi. Ajehchu ILP thu mai mai jeh-a khangdong mi-10 (Meilhei khat jaona a) in ahinkho achan a mi tampi akisuh khah ding hi koima chan ana gelphah lou khat chu ahi. Chule mipi lung kimlou jeh a Eimi MP-pa leh MLA jouse Inn kihallhah ding jong hi koimachan ana gelphah lou ding ahi. Thil umdan hi hoitah a ivet leh baitah a hilchen jou hoi ahi tapon; hijong leh i-magazine uvin adol kham kham ana veu hite.

ILP KIPHINNA HUNG MACHAL DAN:

Inner Line Permit (ILP) system hi British-te khanglai a Tribal (Thinglhangmi), adeh a India Sah-solam (Northeast) gamkai a umho venbit nading a ana kisem Bengal Eastern Frontier Regulation (BEFR), 1873 noi’a hung kisem doh ahi. Chule hiche daan hi Northeast a Tribal ho chenna mun (land), chondan (culture), ham-le-pao (language), chule kivaipoh dan ho vengbit ding’a British ten ana sem ahi. Tribal ho chenna gamhoa jatdang ho chengthei lou, gam jong aki choh theilou diu, ijemtia phat chomkhat kholjinnom aum jong leh Inner Line Permit kiti card (lekha) khat akilah masat diu ahi.

Northeast a ana kikoi BEFR hi India in Independent ahin mu jou in jong Tribal district ho ah ahung kikoi peh nalaiye. Hinlah hiche hi mun dang ho a kon ana kiladoh tan, tuhin Mizoram, Nagaland, chule Arunachal Pradesh bou ah aki koi tai.

India in 1947 kum’a Independent ana mujou 1948 kum a kipat chun Manipur ah Permit System kiti khat ana kikoi in, hinlah November 18, 1950 nikho chun Chief Commissioner Himmat Singh in ajeh imacha pelou in ana ladoh tan ahi.

Kum tampi ahung chenung, 2001 Census (community-wise mijat) ahung kisodoh chun Manipur a Mayang ho population hatah a akal chu Meilhei hon ahin hedoh tauvin, hijeh chun hatah in ana lung linglao tauve. All Manipur College Teachers Association (AMCTA) report dungjui in Manipur population hi 2001 Census dungjui in agom in 23.89 Lakh ahin; hiho lah a hi Meitei-13.62 Lakh; Meitei-Pangal-1.67 Lakh; ST-6.38 Lakh; Others-2.22 Lakh ahi. Hinlah Meilhei kiloikhomna United Committee Manipur (UCM) vang chun Manipur a Gamchommi (Outsider) hi 10 Lakh ahi tai tin asei uve. Hiche hi ivet leh Outsider lah-a hi Kukite jong kisimtha hiding in ginchat aume. 2011 Census dungjui in Manipur a mihem jat hi 28 Lakh aphatan, hinlah community-wise break-up akisodoh loulai jeh in seichet thei ahi naipoi. Hijong leh Meilhei tehin Mayang ho hatah a kaldin agingcha uve.

Hiche dinmun a hi ILP aki chesah louleh phat chomkhat jouteng Kol (Mayang) ho joh hung tamjo uva, Manipur hi amahon ahin toupha ding’u ahi tai tihi Meilhei hon akichat pen’u ahi. Tripura a jong agamnei (Tripuri) ho sang’a Bengali ho tamjo a, imajouse amahon a-control ahi tai.

Hitobang dinmun ahitah jeh hin ILP chesah nading in Federation of Regional Indigenous Society of Manipur (FRIENDS) hon November 15, 2005 a kipat chun kiphinna ahin nei pan uvin, July 4, 2012 nikho chun FRIENDS makaina in Civil Society 32 in Joint Committee on Inner Line Permit System (JCILPS) chu ahin semdoh tauve.

Hiche masang 1980 kum jong chun All Manipur Students’ Union (AMSU) leh All Manipur Students Coordinating Committee (AMSCOC) in kiphinna ana nei in, Manipur Government toh kinoptona (Memorandum) jong anasem uve. Hiche jou 1994 kum chun AMSU in athah in kiphinna ana nei kit in, Government in akinopto na’u natoh a apohdoh din namdetna soi ana kai kit uve.

JCILPS ahung kisem doh a kipat hin ILP kiphinna hi hatah in ahung hatdoh tan, Manipur State government in jong nodthab in akoithei tapoi. Hijeh chun July 13, 2012 nikho chun State Assembly in Bengal Eastern Frontier Regulation, 1873 hi modified bol’a Manipur a chesah ding in kiphatsahna ananei tan ahi. Hinlah Manipur government in Centre kom’a August 3, 2012 nikho a ILP thumna a lekha ana thot chu sanpeh ana hi tapon, JCILPS kiphin na denkhat chu ana losam tai. Ministry of Home Affairs (MHA) Joint Secretary (Northeast) Shambhu Singh chun Mizoram, Nagaland, chule Arunachal Pradesh kalval a state dang’a ILP chesah nading tohgon akinei poi; hiche hi Article 19 toh kikal ahi tin ana seidoh-e.

Centre in Manipur government ILP demand asan peh lou phatchun JCILPS in Manipur Assembly (Manipur Inpi) in daan thah khat Article 19(5) noija asem din angeh tan, hitoh kilhon chun State Assembly in July 12, 2013 nikho chun Resolution khat ana pass kittan ahi. Ahin hiche jong chu ana machal jou deh tapoi.

Aban in 2014 Monsoon Session masang chun Dy.CM Gaikhangam Chairman hina leh MLA RK Anand Convenor hinan All Political Parties Committee (APPC) kiti khat State Cabinet in ana semdoh tan ahi. Hiche Committee chun December 10, 2014 nikho chun point-6 jaona phengmai 282 a sa recommendation khat Manipur government kom’ah ana pelut tai. Hitichun Manipur Legislative Assembly in March 16, 2015 nikho chun Manipur Regulation of Visitors, Tenants, and Migrants Workers (MRVT&MW) Bill, 2015  chu ana pass tan, hinlah akiphin holoi chun APPC recommendation poimo jouse aki jaosah poi tin MRVT&MW Bill chu ana sang tapouve. Hiche Bill hin Manipur sung’a indigenous people ho huhtup jou ponte tia ana sei’u ahi.

Hiche jou hin JCILPS in tukum June Lha kichai konlam chun kiphinna ahin bolpan kit tan, Bill copy ho jong mei in ana halvam uvin ahi. Hiche phat chun MRVT&MW Bill chu Opposition MLA ho titah lou, Congress MLA phabep in jong adeisah loudan’u ahin seidoh pan tauve.

JCILPS in MRVT&MW Bill, 2015 adeilou utoh kilhon in July 5, 2015 chun kiphinna akhoh cheh in ahin banjom kit tauvin, State Assembly in 25th June apat 10th July 2015 sung’a ana kigong Monsoon Session’a Bill thah khat pass abol din angeh tauvin ahi.

JCILPS Students’ Wing le Women’s Wing ho makai na a kiphinna ahung chejom lai July 8, 2015 nikho chun Ananda Singh Higher Secondary Academy a Class-XI (Science) simlai Sapam Robinhood chu Police hon Hatta-Minuthong kom’a ahin kaplih kha tauve. Robinhood hi police hon Simlai hung kijot ho delcheh nading a Rubber Bullet leh Tear Gas ho akap na uva kisukha a ahinkho ana chan ahi. (Churachandpur a vang chu Rubber Bullet hilou, Live Bullet a anakap jeng’u ahi.)

Robinhood kithana hin JCILPS kiphinna hatah in ahin khohset sah tan, Phaisung a July 8 nilhahlam nidan 4:00cn a kipat chun CrPC Section 144 noija Curfew akikoi keo hilouvin School leh College jouse jong ana kikhah tan ahi. Alangkhat ah JCILPS in public curfew akoi in, mipi hon jong muntin ah kiphinna ahin boljom jing tauve.

Hiche kikah lah ahin Monsoon Session la akichai tan, Bill thah la akisei doh tapoi. JCILPS in jong akiphinna ahin suhat cheh cheh tan, ajonan government jong umthim thei talou in Manipur Assembly Special Session chu July 15 nikhon ana tou in MRVT&MW Bill, 2015 chu ana ladoh (withdraw) tauve. Hiche hi Manipur thusim a pass kibolsa Bill kinung lahdoh amasapen ahi nalaiye tin akiseiye. Geldoh thei khatchu hiche Bill hi Manipur Governor Syed Ahmed in jong nopna (assent) pelou a ‘President Consideration’ ding’a ‘reserved’ ana bol ahi.

Government in Bill thah semdoh nading phat Lhathum anathum in, hinlah JCILPS chun ni-15 sung a semchai din gihna ana nei tai. Hinlah ol ol in phat ahung chal in Manipur Assembly in Special Session khat August 28 leh 31 nikho chun ana kou in, tua kisei minthang Bill-3 chu ana pass tan ahi. August 31 nikho a Bill-3 ho ki-pass nikho chu Manipur a thuso hon “D Day” tin ana minvo uvin, hinlah hichu vangset umtah in eiho din “Black Day” joh ana hikha tai. Hiche a Bill-3 ana ki-pass dan hi hoitah a ivet leh Manipur Government hi JCILPS leh ILP deina a kiphin ho thu thu a hung chatloh ahi dan’u akicheh lheh jeng’e. Ajehchu JCILPS in demand abol point jouse abonchan Bill ho achun ana kijaosah sohkeiye.

BILL-3 HO VELVETNA:

Meilhei ten Lha-ni vel tang louhel a kiphinna ahin neina uva athil-thum uchu Manipur a ILP chesah ding tihi ana hin, hinlah ILP chesah ding khel’a Bill-3 ahung ki-pass jeng hi moh geldao thei ahipoi. BEFR, 1873 noiya ILP koiding khel’a Bill-3 ahung ki-pass jeng hi ajeh tampi umjong leh thil-ni hi minphah thei ahi:

(i) BEFR (ILP) hi Tribal ho huhbit nading a kisem ahi jeh-a Manipur a chesah ding hi thil hahsa ana hi himai thei ahi; ajehchu Manipur hi ‘Tribal State’ ahi poi.

(ii) Meilhei te hi ILP mai mai thumdan’a aumvang uva asunglang a alunggel’u achom ahijeh jong hithei ahi.

Inner Line Permit (ILP) System hi agomlam’a seiding hileh ahimo ding chu ahipoi. Ajeh chu State leh Central government in aphatsah a, Parliament in BEFR chu Manipur a extend akibol nathei ding’a “Amend” abol leh hijeng thei ahi. Hinlah ivetthuh jep leh Manipur a ILP ahung kikoi ding hi ahahsat na tampi aum’e.

(i) ILP hi Tribal State (Area) ho venbit nading a ana kisem ahi in, Manipur hi Tribal State ahilou jeh in Parliament in Constituion Amendment Bill khat, ahi lou leh Manipur a ILP chesah nathei ding Bill khat pass abol masat angaiye.

(ii) Hinlah ILP akiti teng athupi pen’a Mayang/Kol ho ven nading ahi jeh in Centre lang a Kol hon ajat chanpi ho nodoh nading tohgon ahin neidiu jong tahsan um behseh lou ahi. Ajehchu masang a kipat a Centre in Manipur a ILP chesah ding hi ahin jahda peh ahi.

(iii) Manipur hi State neocha hijong le Jat-le-Nam tampi chenkhom na ahi in, Meilhei te sehseh in demand abol laise a hahsa ding ahi. Nam jouse in tosot hih jong leh Tribal ho lah a Kuki-te leh Naga te beh in tosot na apeh lou leh Centre in Meilhei te thil thum chu ahin khohsah nading hahsa ahi.

(iv) Aboi na kit khat chu Meilhei te hin demand dang jong tampi anei uve. Hiho lah a India Constitution Article 3 Manipur a chesah lou ding; Manipur hi Hill State hisah ding; Nam jouse daan kibang (uniform law) noi a koiding; Upper House (Legislative Council ) semdoh ding tiho hi ahi. Alangkhat a Tribal honjong demand tampi inei kit uve. Hijeh a hi Centre in Demand kibol hohi gangtah a apeh theilou na um ahi.

BILL-3 HO ANTI-TRIBAL BILL AHI TIA AKISEI LO NA:

ILP kiphinna ahung machal jing toh kilhon a August 31 nikho a Manipur Legislative Assembly in pass ana bol Bill-3 hochu:

(i) The Protection of Manipur Peoples Bill 2015 (or PMP Bill);

(ii) The Manipur Land Revenue and Land Reforms (Seventh Amendment) Bill 2015 (or MLR&LR Bill); chule

(iii) The Manipur Shops and Establishment (Second Amendment) Bill 2015 (or MS&E Bill) ahiuve.

Hiche Bill thum hohi achom cheh dan in umjong leh adoi uhi khat ahi. PMP Bill in aseinom pen hi Manipur-mi hilou Outsider jouse Manipur a ahung lutding a ahileh ‘Pass’ (phalna lekha) akilah masat diu, akilah lou aum leh gotna kipe ding tihi ahi. Hiche hi hoitah a ache leh State a dia income hoitah ahikeo hilou a Manipur a Outsider ho apunbe jing hi ki-control jouding ahi tia atahsan’u ahi.

MLR&LR Bill, 2015 in aseinom hi Outsider hon Manipur a Gam (Land) achoh thei loudiu, achoh tahdiu jong leh State Government phalna akilah masat diu ti hi ahikit-e. Achaina a MS&E Bill, 2015 in adoi hi Manipur-mi hilou hon Manipur sung’a State Government phalna umlou a Dukan leh Building ho akisah theilou diu, sumkolvei tiho jong abol theilou diu tihi ahi. Hiche ho jouse hi ivet leh Manipur a Innmun-Loumun ho leh Kailhang ho Gamchom mihon sum thahat a akichoh uva atoupha jeng jiuhi ven nading; chule Manipur a Kol ho aniseh a apunbe jing hi kham nading ahi. Hijeh hin igelleh thil phatah toh akilou’e.

IPI JEH-A MEILHEI HON HICHE BILL-3 HOHI HIBANG A AKHOHSAH-U HAM?

Manipur hi gambeh neocha 22,327 sq. km. bou a lien ahi in, hiho lah-a 10% (2,238 sq km.) bou hi phaicham; chule adang 20,089 sq. km. hi thinglhang-gam ahi. Phaicham a gambeh neocha toupha ahijeh uvin Meilheite hin thinglhang gam hi aducha mama jeng uve. Hijeh hin ol ol in thinglhang gam a um Town (khopi) ho ah Revenue ahin polut uvin, eihon jong asungthu hethem lou in kipah tah in ina sang tauve. Hijeh hin Kanggui (Kpi), Moreh, chule Churachandpur (Lamka) dung ah Meilhei te nomtah in achengthei tauve. Revenue hi ana kilutsah lou hileh thinglhang-gam ho a Meilhei ho achen uhi daan sukeh hidiu ahi.

Phaicham mihon ana-ha seipen chu: Kuki hon Haosa khut-a full power napeh uva, adei phat phat a kho-chaga ho khosung a kon anodoh theina jeh uva koimacha lungmong a chengthei lou ahi. Hijeh hin Revenue lut henlang, kho-chaga hon jong ‘patta’ neithei cheh leh mijouse lungmong in chengthei intin, khuti leh khosung-vengsung khantou na umthei ding ahi. Chujong leh Town lah dung a development aumthei nading in Town Committee leh adg. ho kitung doh thei henlang, mipi thanei na kipe leh khanthouna (Development) ahin pohlut thei ding ahi atiu ahi.

Hiche hi Haosa atamlang in khosung adei dei’a apoh uva development fund hunglut jouse anehchai pai pai jiu ahi jeh in adihna tah aum’e. Adeh in MGNREGS ahunglut a pat hiche hi ahung kiha sei dehset-e. Hinlah Meilhei ho lungput hi thinglhang miho khantousah nading hilou’in thinglhang-gam duchat na joh ahijoi. Thinglhang-gam titahlou phaicham jeng a jong Tribal ho Inmun hohi Meilhei (or Tribal hilou) hon akichoh thei lou ahi. Hijeh hin MLR&LR Act, 1960 hi masang a pat thinglhang-gam a chesah ding ana go jing uvin ahi. Hinlah Tribal organisation hon hatah a ana tin jeh uvin tuchan in alut naipoi. (MLR&LR Act, 1960 hi thinglhang-gam a alut khah leh thinglhang-gam mun hoilai jouse Meilhei ten sum thahat a akichoh chai thei’u ahi).

Agomlam a seiding in hiche Bill-3 in adoi hi, Khatna, Outsider ho ven nading; chule Nina, thinglhang-gam (adeh-a Kukite chenna munho) lut nathei ding tihi ahi. Hiche hi alolhin thei nading in Kukite hi ‘Foreigner’ ahiuve tin hatah in ana samphong uve. Hiche a Kukite atiuhi British-ten New Kuki tia ana het Thadou-Kuki pao thoho leh Paite ho ahipen’e. Hetding khatchu hiche teni hi Eimite lah-a population tampen jong kihi ahi. Kukite Foreigner nahiuve tia ana ha seipen hi International Meitei Forum (IMF) ho ahiuvin, chomkhat jou in Meitei Youth Forum (MYF) ho leh Indigenous Peoples Association of Kangleipak (IPAK) ho jong ahung jao tauve. Hitia hatah a Foreigner thu ahin lhangsap jeh uvin Meilhei te alien-aneo in Kuki hohi Burma (Myanmar) a pat hung chenglut Foreigner (Illegal Immigrant) ahiuve tin agel thei tauve.

Chujong leh mi apuncheh cheh toh kilhon a Innmun-Loumun ahung hahsat jep jep phat a thinglhang-gam ahin duchat-u ahin, hiche hi alolhin thei nading leh a-kiphin nau ahat thei nading a Propaganda a aman uchu: Kolho leh Kuki ho ahung lut be be jeh a igam’u neo ahitai tihi mipi ho lungthim’a atulut peh-u chu ahi. Masang a chu ina geptho jiu ahi in, tuchung a vang hi lhangphong a eibol’u ahi tai. Hinlah vangset umtah in Kuki Research Forum (KuRF) hon Newspaper lah-dung a Foreigner ihi loudan’u ana tahlang kalval uvin Civil Society leh kiloikhomna dang koima chan ana donse poi.

Lhani lam jen nasatah a kiphinna ana neithei nauchu adang jeh ahi pon; ILP aumlou leh kum phabep jouleh Kolho le Foreigner (Kuki) hon igam jouseu atoupha diu, Tripura a Tripuri ho bang a igam uva minority ihi diu ahi tai tia hatah a ana lhangsap jeh’u ahipen’e. Detmah aum natah khatchu Bill-3 ahung ki-pass a Governor phatsahna ‘Assent’ lahding ahung hitah phatchun IMF hon jong alamkaipau RK Rajendro thusei chu Forum in kapompeh pouve tin suhthengna ana nei uve. Chujong leh UCM, AMUCO, ICHAM chule adg. in jong Kuki-te hi “Indigenous” mi mong mong ahiuve tin ana samphong kit uve. (Bill a kijih achom ahin, kampao a asei’u achom ahi. Hinlah hitobang dinmun a akidin laitah chun KIM in British te khut akon Manipur ana huh chu Meitei te leh Kuki-te bou kahiuve tin ana samphong uve.)

BILL-3 HO ANTI-TRIBAL AKITI NAJEH:

Achunglam a hung kisei bang hin Bill-3 hohi apolam a vetding a Manipur miho huhbit nading ahi. Hinlah asung lang a adoi chu hiche sehseh hi ahi poi—Manipur miho jong huh ding, thinglhang-gam jong lut nathei lampi semding tihi ahi. Hiche hi hetdoh thei ahina ding in point phabep ana veu hite.

(i) PMP Bill dungjui hin 1951 kum hi Cut-off (base-year) ahin, 1951 masang a Manipur a ana chenglou jouse chu Manipur-mi hilou diu, Innmun-Loumun anei theilou diu ahi. Hiche hi akihet nading a National Register of Citizens, 1951; Census Report 1951; chule Village Directory of 1951 a amin umho bou chu Manipur mi a kisim ding ahi. Hetding khat chu 1951 titah lou tujeng a jong Gari lhunlou na thinglhang-gam mun tampi um nalai ahin, 1951 hi cut-off a akisim ding mong mong leh tua thinglhang miho akehkhat beh hi Outsider (Mayang) ihidiu ahi tai. Ajehchu 1951 kum’a Government record a amin ana kijihlut hi themcha bou hiding, akijihlut hojong adihlou dimset kit nalai ding ahi.

(ii) PMP Bill hi Act ahung hi leh Manipur pumpi (“whole State of Manipur”) a kichesah ding ahi tin aki sei kit-e. Akhuti leh hiche Bill hi guhthim’a thinglhang mi ho kigepna (kilhimlhah gotna) hitei ding a ginchat ahi.

(iii) Hiche Bill mama hin Manipur hi “one of the hill States in the North-Eastern region of India” tin aminvo kit-e. Tunichan a Manipur hi “hill State” tia kisei khalou ahin, hiche Bill hi Act ahung hi leh Manipur hi Official-a ‘Hill State’ hiding ahi tai. Hiche hi ST Status demand abolna uva jong kalbi phatah hung hiding ahi.

(iv) Hiche PMP Bill noija Manipur-mi (Indigenous people) hilou jouse chun MLR&LR Act leh MS&E Act noija chanvou ho atohkhah thei tahlou ding ahi. Hiche Bill teni hi achom a ivet leh tijat nading behseh chu ahipoi. Hinlah PMP Bill toh ivetkop leh “Sa Ineh ban iki loilhah peh” tobang ahi tai. Hitiho jeh a hi thinglhangmi jousen kilungtoh tah-a Bill-3 hohi adou dal’u ahi.

IPI JEH-A ILP DEMAND BOL UVA BILL-3 HO JOH HI PASS KIBOL HAM?

ILP hin India-mi state khat a kon a state khat a lut ho avetsui ahi. Hinlah “Inter-State migration” kiti hi Indian Constitution (Seventh Scheduled noija Entry 81) dungjui a Union List a jao ahi in, Centre (Parliament) thaneina bou ahi. Hijeh a hi ILP khel a implement bol ding a hiche PMP Bill hi pass ana kibol ahi. Law expert ho lunggel alah uva amaho sei dungjui a India Constitution Article 19 (5) noija anasem’u ahin, hiche article ahin hiti hin akisun’e:

19.(5) Nothing in sub-clauses (d) and (e) of the said clause shall affect the operation of any existing law in so far as it imposes, or prevent the State from making any law imposing, reasonable restrictions on the exercise of any of the rights conferred by the said sub-clauses either in the interests of the general public or for the protection of the interests of any Scheduled Tribe.

Article 19(5) na a Meilhei ten aha minphah pen’u hi “reasonable restrictions”... “in the interests of the general public” kiti thucheng hi ahi. Chule sub-clauses (d) and (e) ati hi Article 19(1) noija Right to Freedom gup kipe holah a ni ahin, hitihin akisun’e: 

(d) to move freely throughout the territory of India;

(e) to reside and settle in any part of the territory of India.

ILP kiphinna ana hat laitah chun Bill ki-pass nama jong leh Centre in ahin sanpeh ding hinam tihi mi-tampi lung opkaina ana hipeh ahi. Hinlah mi-phabep chun Centre in asanpeh-asanpehlou ding thu a boi angaipoi ana tiuve. Chuleh ijemtia ILP Bill hi alosap khah tah jong leh Assam a National Register of Citizens (NRC) khu ham; ahilou leh Himmat Singh in cancel anabol Permit System chu ham khatjoh joh Manipur a thah chesah nading lunggel jong anei uve.

IPI JEH-A HIBANG’A HI EIMI-TE INA SOUSANG KHAH UHAM

Tuchung ILP toh kisai a Bill-3 ki-pass jeh a thinglhang-gam adeh-a Churachandpur mei akou leu hi koimachan ina ginchat loudiu ahi. Hinlah Chapang khat jaonan homtho umtah Khangdong mi-9 jen in ahinkho anachan tan, adang tampi in maha ana kipoh tauve. (Hiche thu hi Article achom in kicheh deu in anasim ute).

Hinlah agomlam a seiding hileh Bill-3 jeh sehseh ahi pon, phatsottah hung kisel Phaicham miho leh Thinglhang miho kikah a kibung khenna hung kiphong jel ahi. Kum-3/4 masang a kipat a “foreigner” title eihin peh-u; centre in thinglhang miho ding a ahinsol development fund jouse (self-style Nam lamkai phabep toh kitho a) anehchai jing’u; Eiho kivaipohna (Chieftainship le adg.) suhmang pehding agot jing’u; chule State Government in thinglhang miho donse lou a ahin koijing nau hohi minphah thei ahi.

Hitia phatsottah kiphong jal lou’a ana um thil hochu Bill-3 ahung ki-pass jou’a chu hung kiphong jal ahi. Chule July 18 nikho Moreh thilsoh jong chun ichangei hamkhat-a mipi ho lung (sentiment) ana tohkhah ahikit-e. Thil umdan jouse hi ivet leh Meilhei ho akon “Separate Administration” imu’u tilouva lungmong a chenna ding lampi umlou hel ahi. Phaicham miho ILP demand bolna a ana kiphin laitah uva ISTV, Impact TV, AIR (Radio), chule Newspaper jousen ILP bou ana lhangsap jeng’u sehseh jong hi chihna a neithei ahi tai. Hijeh hin tuchung thilsoh a kon ikilungkhat nau hi moh-a aman khah leh Nampi a ding a ahinkho ana phal Khangdong mi-9 ho Lhadam (Lha) lunglhai louhel ding ahi!***

 (Re-written from the earlier version for KHOHUI Monthly News Magazine)