Khangdong ho ding’a kitilkhou nathei tah Bosco hinkho

"Genthei tah a lekhasim toh sumhol kahinkop ahin, tunvang Pathen lungset in business neokhat kabol a kon hin niseh leh Dk.10,000 tobang kamu thei tan hahsa lou beh in sumhol toh lekhasim kakop thei tai.”

Hiche thucheng hi Bosco Rengtankhel Jaiche in nikhat Manipur University Campus sung a kaki houlimna lhon a asei ahi. Bosco toh hin achesa kum-phabep sung hin kahung kivop lhon tan, Loi-le-Pai hinan lunggel jatchom chom jong kasei khom ji lhon’e. Miphatah ahi in kahahsat na jouse ah jong eikithopi jing’e. Ham-le-pao kibang aki-hilou vang in sopi Eimi gel hinan kingailu tah leh kisato thei tah in hinkho kamang ji lhon’e. Khatvei vei teng leh ka-insung umdan lhon hojong kaseikhom ji lhon in, loi-le-pai mai mai hitalou in sopi kinaicha bang in kaum ji lhon tai.

Bosco hinkho a pachat um kasah tah khat chu ama jong genthei tah a hung seilen a sum-le-pai kihol toh lekhasim hinkop ahijeh in ahithei chan’a chapang-khangdong simlai, adeh a inchen genthei ho ijokham kham a kithopi jing ding ti lunggel anei pa hi ahi. Mi bang a mihaosa-mibolthei jong chu ahideh pon, hinlah aman phatsotpi genthei ahinthoh nung’a sumkolveina neokhat abol a kon sum-le-pai amukham kham ho khangdong ho hinkho semna a mang din kigellhah na anei in ahi.

Aman aseina ah Class-XII kahin chai chun Kanu-le-Kapa in ‘Boi, igenthei behseh uvin lekhasim nga inlang sum hol nathei khatjoh kingaito tan’ tin eina seipeh lhon’e. Masang chun kapa in Motlei (Banana Farm) abol in hiche a amukham kham a chun ka-ucha uvin lekha eina simsah uvin ahi. Hinlah 2005 kum’a Class-XII kahin chai chun Ka-Upa la ajinei tan, kapa Motlei bol jong kivahjou nakham bep ahung hitai. Chule kanule kapa hin sum mu nading dang anei lhon pon, hiche jeh a hi eina sot jou lhon lou ahi tai. Hinlah hiche hi khonung in kahinkho kikhelna khat ahung hidoh-in tuhin Pathen lungset in business neocha kabol hin kei le kei ei-sotjou keo hilou in kanu le kapa jong nomtah in kavah jou tan, chule kajo kham kham in insung jong kakivet jou tai tin asei in ahi. Hijeh hin ama hinkho thusim, chule thusim dang dang mangcha in khangdong ho tilkhouna aneiji.

Eimite hi ivet leh sangtah geithei ding khangdong ijat hamkhat Inchen hahsat jeh, ahilou leh boina jatchom chom jeh in ina lungneo kha jiuvin iphahna diu mun ina phajou ji pouve. Hiche hi vangset umtah khatchu ahi. Hinlah hitobang boina-hahsatna hochu kimaito pi a hung lolhing jong umlou ahideh poi.

Mihem jousen lolhin ding adei sohkei-e. Hinlah alolhing hi mijouse ana hiji pon, tamtah lah-a themcha bou ana hiji. Lolhinna akiti teng mi hetthei tah-a, lentah a lolhing jong aum in, mi hetkham hibehseh hihjong leh neocha cha a ama hina khambep a lolhing jong aum’e. Hitobang’a neocha a lolhinna hinnei Eimite lah a Bosco jong hi khat a simthei ahi. Mi hetthei tah in umdoh jou hihlai jong leh tuchan a Inchen genthei naho jouse kimaitopi a pan hinla jing khat chu ahijeh in pachat umtah ahi.

Bosco hi Sadar Hills West hopsung a um Kharam Pallen vangkho ah achesa 1987 kumchun Pu Rengtankhel Jaiche leh Pi Neikahoi Rangla laigilga athumchan na din ana peng in ahi. Akho hi Phai a pat Kilometre-35 tobang gamlha Imphal-Jiribam lampi kom’a um ahi in, isopiu Kharam tribe ho ding a sinthei umtah khangdong khat ahi. Amahi Ucha Pasal-3 leh numei khat lah a athumchanna ahiye.

Chihna-thepna lam’a Matric chu 2003 kum in St.Joseph School, Tadubi ah ana chai in; Class-XII (Science) hi Johnstone Higher Secondary, Imphal ah 2005 kum’in ana chai kit in ahi. Aban in Graduation hi Manipur College ah admission ana kibol pai ngal in hinlah insung miten asot joulou phat uvin College adalha in IGNOU joh-a Bachelor of Social Work (BSW) ana bol tan ahi. Bosco in BSW anabol chun amaho batch a kum manglou a chai ama bou ana hi. Abankit-in Master of Social Work (MSW) chu Indira Gandhi National Tribal University, Regional Campus Manipur (IGNTU-RCM), Chingmeirong ah 2012 kum chun ahinchai in, Guest Lecturer in jong phat chomkhat ana pang’e.

Tutu a hi Manipur University (MU) a Ph.D abollai ahin, Kharam Tribe sung a dia Ph.D bol amasapen ahi nalaiye. Hiche ho kalval jong hin tukum 2015-16 term sung a din Manipur University Tribal Student Union (MUTSU President in lhendoh ana hi in, Kharam tribe sung a hitobang kiloikhomna khat a alubuh hina hintuh amasapen jong himaithei ahi nalaiye.

Hetthei khatchu Kharam tribe hi Manipur sung a Nam neoloi tah ahiuvin, 2011 census dungjui in mihem-1145 bou ahi nalai uve. Chujongleh Manipur pumpi ahin Kho-li bou aum in, hiho lah a Kharam Pallen bouhi kholhing ahi. Kharam Pallen hi Inn-100 vel ahiuvin, Kho Haosa ana hi khattoh kaki houlimna achun hiche kho hi ‘kum 1724 vel a ana kiphut doh ahi tai’ tin aseiye.

Achung lang a kahin seima bang in Bosco hi insung genthei jeh in Class-XII ahinchai chun a-insung miten aban nakison jou taponte, Na tohthei thei tong in lang sum kihol tan tin ana vailhah uvin ahi. Hitobang dinmun toh hi Eimite lah a adang tampi jong um teiding ahi. Hinlah Bosco vang chun Na toh a lekhasim ngah jeng ding chu ana gelthei poi. Hitichun sumhol toh lekhasim ahin kop in hahsatna ijat toh jong leh lung lha deh lou in pan ahinla jing in ahi. Hitobang dinmun hi atohkha hobou in ahahdan ahet ding ahi.

Bosco hin ama ding’a natoh amasapen din 2006 kum chun Diocesan Social Services Society (DSSS) kiti Catholic Organisation/NGO khat ah Na ahin tong pan in 2010 ana tongjom peh-e. Hiche organisation a Na atoh til chun lhalo 2500 bou analo in, achaina lam chun Dk.4000 vel ana sang in ahi. Hitichun Surf/detergent leh Dish-Wash semna a kimang thil ho supply bol in ana pang in midang sumkolvei ana tosot in ahi. Phat chomkhat jou in hitobang sumkolveina chu aphatchom dan ahin muchen tan, hijeh chun aman jong DSSS chu adalha in Surf leh Dish-Wash business chu ahin pan ngal tan ahi. Hiche business ahin bolpan na Dukan mun hi Mantripukhri, CRPF Camp komchet khu ahi in, tuchan hin aboljom jing nalaiye.

Hinlah lekhasim toh kop ahijeh in phat jousen dukan aboipi theipon, hijeh chun aloikhat toh ahung kitho lhon in ahi. Dukan lam’a aloipa amopohsah in, aman supply lang leh munchom chom a che nading ho aboipi ji. Hitichun 2010 kum’a kipat in ahung kiloi lhon in, niengkum October 2014 chun amani jong achang cheh a hithei ding ahilhon phat in ana kikhen lhon tan ahi. Hiche a akikhen lhon chun paisa-ima akeh keh in akihom lhon’in, aloipan jong lunglhai sel in ama business akiboipi tan ahi.

Hitia aloipa toh akikhen jou lhon chun Mantripukhri a dukan chu aman ahin kiboipi peh in, tutu hin natong in mi-3 apansah in aman MU a PhD boltoh, jingkah-nilhah a dukan vetsui akop ji. Bosco in aseibe na achun: “Mi vetdin ima hihih jong leng Pathen lungset in Kanu le Kapa nomtah in kavah thei tan, chule Inn jong vetthei dom in Repairing kakibol doh tai. Hiche kalval jong hin avesui ding um talou meithai phabep natoh kape in, hahsa louhel a sum akilo keu-u hilou in neh-le-chah manbei in kape uvin, hiche hi thilpha kabol na a kalah ahi” ati. Lungset umtah khatchu business ahung kipat tillai a natong a ana pansah meithai khat jong tuhin government service akimu tan ahi.

Bosco hi pachat aum natah kit khatchu IGNTU-RCM a PG (MSW) ana chai chun Gold Medal nijen ana sang in, hiteni lah-a khatchu Subject Topper ahijeh ahi in, khatchu Campus pumpi a asangpen ahijeh ahi. Dukan boipi toh lekhasim kop ahi vang’a a atomngai nachu hiche result a hi hetdoh jeng thei ahi. Lekha simding sehseh a khopi dung a kiumsah khangdong ijat hamkhat First Class cha jong ngajou lou, abang deh deh chu pass jou kitlou kitam ahi!

Bosco hinkho thusim a kon mudoh thei khatchu ithoh ngapchat pouleh alampi pi aum’e tihi ahi. Ama jong a-insung miten ‘nakison jou taponte’ atiuchun ana nga jeng leh tua aphah nahi ana phahjou lou maithei ahi. Hinlah insung hahsat nachu kitilkhou na’in anei in tuvang hin PhD Scholar khat ahikeo hilou in insung jong phatah in avesui jou tan, asopi ho jeng jong ajo kham kham in akithopi thei tai. Chule UGC-NET certificate jong anei tan, Assistant Professor a ding’a qualified ahi tai. Hinlah ama hin Ph.D dam’a kachai thei a ijemtia Academic Post (natoh) hoi khat kamu joulou tah jong leh ka-business hi suhlet a eima cham a kivah ding hi hatah a kadei joh ahi ati.

Lolhinna hinnei ho thusim hi mihem khat thusim mai mai a igel a isim leh imacha hilou ahi. Hinlah Small Scale Entrepreneur mai mai hijong leh Bosco hinkho hinman ding dan hi hoitah a igel leh thilbai hilou ding ahi. Ajeh chu lekhasim toh natoh kop kiti chu thilbai ahi-naisai poi. Eiho vang chu lekhasim mai mai jong kijou jilou ahi. Phai a kahung um nahi kum-10 ahung lhing tan, College kai khangdong atamjo hi hinkhonom mang mai mai dan in ium uvin, hiche jong hi pohnat umtah ahi. Hijeh chun khangdong ho athah beh-a ikigel diu deisah ahi. Ijem tia neilou jeh a lungneo ihikhah-u jongleh isopiu Bosco hinkho thusim a kon’a hi iki tilkhou diu kanom’e. Aman khangthah, adeh a ama bang a insung hahsa ho athumop nom chu: “Ilungneo behseh leh imacha aki boldoh jou poi; hijeh hin lunglen tah-a hinkho man ding ahi” tihi ahi. Geldoh thei khatchu ama jong hin a-Loi (buffalo) ajoh a business bol hung kipan ahi in, tuhin athohhat na ga anethei tan ahi.

Bosco hi thil neocha a minphat chang hijong leh Kharam tribe sung a dia khangdong hon kitilkhou na tah a anei-u khat ahi in, pachat umtah chu ahi. Aman aseina khat ah: khangdong hohin hinkho manlut dan het a khamnathei (drugs) a kon’a kikangse ding ahi. Khangdonlai kiti hi khonung hinkho a ding’a kigot phat ahijeh in all-round—Education, Physical, Moral chule Spiritual—lam a hatah a kichuh phat ahi. Chule eima talent/thanopna lampang kihet a hinkho manding ahi.

Seidoh nom: Hiche a kon’a iseidoh nom pen uchu boina-hahsat na jeh a lunglhah jeng louding tihi ahipen’e. Bosco in jong hahsatna tampi kimaitopi in pan ahinla jing in lekhasim pum’a ahung tompan na tuhin aga ama keo hilouvin a-insungmi asopi hotoh anethei tauvin ahi. Hitobang thohhat na ga (fruit) hi mijouse moh chanjeng theilou ahi in, hinlah ngailutna neitah a pan laho jouse vang changthei ahiye. Hijeh chun khangdong ho jousen jong Bosco hinkho hi kitilkhou na in nei-u hitin insung-vengsung, chule gam le nam ngailut na jal in thohhat tah in pan laleu hen eihon jong ithohhat ga-u nikhat imu thou thou diu ahi.

Bosco hi kaseima bang chun business lientah bol a Lakhpati/Crorepati hi ahi deh pon, hahsa tah a business neocha bol’a ama le ama hung kisem ahibouve. Hijong leh lung lhadai louva pan ahinlah a tua amachangseh kisemdoh thei a ahung um hi pachat aum’e tia ahinkho thusim eihon jong kitilkhou na a inei diu deisah na a hung kijih ahijoi.***

(Hiche article hi Khohui Magazine a ding'a kajih ahi)