Gl. Ronald Sitlhou lungput hi Vetjui thei tah ahi

Mihem jousen thilpha hi thil lientah chung’a kiboldoh jou hih jong leh eima hina khambep cheh a bol thei cheh ahi. Ajeh chu koi jousen thil lientah boldoh nathei hina kinei lou ahi. Hinlah midang ding in thil lientah boldoh joulou ding hijong le hen eima dinmun toh kitoh a ijokham kham a thilpha bolding hi Pathen in mihem khat-a eihin semlo najeh ahipen’e.
Vetsah nan, MLA/MP/Minister khat ahilou leh MDC khat chun ama hina (thaneina) toh kitoh a japi ding a atoh thei umding ahi. Hitobang a chu IAS/IPS ahilou leh MCS/MPS khat jong chun ama thaneina dungjui a abolthei um ahi. Natoh neocha cha nei, ahilou leh service imacha neilou khat jeng jong chun thilpha abol nathei umkit thou ahi. Hiche a thilpha bolding kiti pen hi eima tohding (duty) kalval’a midang ding a ibolthei natoh ho tina ahipen’e. Hitobang a thil neocha ama Hina khambep a engse louhel a thilpha boljing ho lah-a Ronald Sitlhou leh aloiho ho jong hi khat ahi.
Ronald alias Khumminthang Sitlhou hi 1986 kum chun Churachandpur gamkai a um Chengkawnpang vangkho ah ana peng in, eiho kah-a kiboina jeh in 1997 kumchun Phai lam ah ahung kichon uvin, tuhin Imphal khopi sung a um Newlambulane ah acheng uve. Thepna lam’a 2010 kum chun DM College of Arts ah Graduate chu Geography (Honours) in First Class in ana chai in, chujou in MA (Geography) chu Manipur University ah 2013 kum chun ana chai kit-e. Master simtoh competitive exam a ding’a kigot akop jing lai in SSA noija Primary Teacher kilah nakhat ah pachanna ana neipai in, Master achai chai chun hiche Primary Teacher chu ana joppai tan ahi.
Hiche a jong chu kichai louvin UGC-NET/JRF jong ana pass in tutu hin Guwahati a um Gauhati University (GU) ah PhD a din admission akibol tan ahi. Alangkhat ah Competitive exam lunglut mikhat ahitoh kilhon in SSC-CGL 2014 exam ana bol in, Tier-II chan alolhin toh kilhon in June 2015 chun Interview din ana kalsong doh in, tu tua hi Result nga toh kop a GU a Research abol lai ahi. Hetthei khat chu Ronald hin SSC-CGL hi kum masa lam’a jong ana mu ahitan, non-interview post ana pehjeh uva ana lahlou ahi.
Gl. Ronald Sitlhou hin GU a Research agabol masang, SSA Primary Teacher atoh pan a kipat chun Facebook Group ‘THEMJIL’ hi ana jop pan in, chomkhat jou in Admin khat din upgrade ahung hitan ahi. Hiche a kipat chun thanom tah-in pan ahinla in tuni chan hin pontho tah in eimite lah-a competitive lam thanom hon job toh kisai information jouse baitah a amujing thei nading in Admin dang hotoh kitho in pan ala jing uve.
Hetding khat chu THEMJIL kiti hi 2009 kum chun Gl. Thangtinlen alias Slim Sitlhou in GupSup mobile news group khat din ana semdoh in, hichu mobile news ahung boi a Facebook ahung minche jep jep toh kilhon in Facebook group (www.facebook.com/THEMJIL)  khat din ahin heidoh tan ahi. Hiche group hin Eipao (adeh a Thadou-Kuki) leh English mangcha in job (natoh) toh kisai information (hetding a lom) jouse asodoh jing in, mi tampin aphatchom pi tan ahi. THEMJIL a information hohi Facebook keo hilou in Google blogspot a jong manbei in akiso jing in ahi. Facebook group tampi umjong leh Eimite lah-a Competitive lam bou focus bol hi THEMJIL group bou ahijeh in member akibe jing in, June 10, 2015 nikho chan chun member 13,116 alhing tan ahi. Member thah Add bollam ahin Admin ho keo hilou in member tampi injong pan nasatah in ala jing’e.
THEMJIL group hin hiche Facebook group aboipi keo hilou in niseh thuso EIMI TIMES jong natoh toh kisai information/notification ho ana pejing in, hijeh hin THEMJIL memebr hilou (ahivang a EIMI TIMES newspaper simjing) hodin jong job toh kisai information ana hetsah jing’e. Tuhin EIMI TIMES keo hitalou vin niseh thuso thah Hills Today leh Magazine dang dang hojong aki thopi jing in ahi. Chujong leh THEMJIL group hi Facebook group dang dang hotoh jong kihetthem tona anei in, THEMJIL member hilou ijat hamkhat in jong group chom chom a kon in THEMJIL group Admin holeh member ho thuso doh ho asim jing thei uve.
THEMJIL group in regular tah a asodoh jing information holah a hetthei dom hochu: Job/Employment Notification, Exam Result, Eimite lah-a natoh muthah holeh a-natoh na a kong hung kaisang ho, Exam chom chom a lolhin na sang tah tah hinnei ho, Degree sangtah tah hinmu ho, chuleh thildang dang ahi. THEMJIL group hin natoh (service) lamtoh kisai information hetthei dom ho jouse sodoh lou aneipoi kiti leh kisei val lou ding ahi. Hitobang ma hin Eimite lah-a natoh na sangtah tah hinmu holeh lolhinna jatchom chom hinnei hojong sodoh lou a akoi hi umbehseh lou ding ahi.
THEMJIL group in hichan chan a lolhin na aneithei nahi admin ho leh member ho, chuleh aguh-a admin ho kithopi jing hojeh ahi. Hiho jouse lah-a pan halah pen a seithei chu Gl. Ronald hi ahiye. Facebook a Ronald minche dan hi competitive exam lam’a lunglut na nei facebook account nei ho ahelou umbeh seh talou ding ahi.
Khatvei chu Ronald kom’a ipi jeh mong mong a hichan chan a hi Facebook group THEMJIL leh EIMI TIMES ho a soding job toh kisai information hohi naboipi jeng ham tia kadoh leh; Primary Teacher khat hina a Class phate a alah theilou jeh-a mihilna a phat, chule tha le jung asen ding khel a job toh kisai information ho aboipi ahidan asei in ahi.
Hetthei khat chu Manipur sung a Primary oja, alhangpi a Council oja tia ihet hou atam lang hin school kailou a akhel a mi apansah jiu ahi. Hiche hi amahon class galah nom lheh ujong leh school umna khomite atam lang hi nomkit jilou-u ahi. Ajehchu amaho khomi khat in akhel diuchu adeisah joh jiu ahi. Oja atam lang in Class chelou hi phaje sah jong leh alung nomlou tah tah jong umda lou ahi. Hitobang a kitah tah-a Na tohnom holah a Ronald jong hi khat ahi. Hinlah posting alhah na school umna khomiten anoppeh lou jeh uvin ama nop le da kibang in akhel in akho-neite khat apansah tauvin ahi. Hiche hi Ronald in ama hinkho sung’a apohgih pen khat chu ahi. Hijeh a hi hiche pohgih hi themkhat beh ajanjep khatleh tia thildang (ajat mite) phatchom nathei ding a aphat manlutah ho amanchah jing ahi.
Facebook group khat a information post bol mai mai khat a igel ding leh imacha hilou ahi. Hinlah hitobang natoh hi hoitah a igelleh thilbai hilou ahi. Gah-hetthei din themkhat kisei leh; hiche hi hoitah a boipi ding khatchun anoija kipe hohi anei keo hilou a phate a amanchah ngai ahi.
i)                   Mobile phone, Smart phone, ahilou leh i-Pad mai mai a hahsa ding ahijeh in Laptop/Computer a internet connection neijing angaiye.
ii)                Manipur hi 2G mangcha a Computer a internet lut hahsa jep ahijeh in 3G connection neijing lou akhoh lheh-e.
iii)              Job information hohi aphat chet chet (ahilou leh agangthei pen) a sodoh jing ngai ahijeh in niseh a website ho check boljing ngai ahi.
iv)               Midang in detail ahetnom ho ahin dohjing ding ahi jeh in mobile phone toh kilhakang louva umjing ngai ahi.
v)                 Chujong leh midang a kon a information lah jong hung ngaiji ding ahikit jeh in mobile phone choi mai mai hilouva account a balance kichatlou a koijing jong angai kit-e.
vi)               Facebook group a post bol kichai teng leh Newspaper ho a so ding a thot kitding ahijeh in e-mail phatseh a thamjing angaiye. Chuleh newspaper a soding ahitah jeh in athucheng ho ahithei chan’a chomsah a kichehsah ding ngai ahijeh in phatlut tah a edit bolkit jong angaiye.
vii)            Facebook group hamkhat a chu thilkhat aki-post tengleh comment/post-chom a thudoh hinnei ho donbut jing ngai ahijeh in athu hoitah a het keo hilouvin, phatseh a post a comment holeh inbox check jing jong ngai kit ahi.
Hiche a hung kipe point phabep sehseh jong hi ivet leh koima pou in ajo ding thil hilou ahi. Ajeh chu hiche boipi nading a hi koima cha in sum-le-pai apeh lou ahi. Hiti ho jouse hi suh bulhit nading a aphat mantam tah asuhmang keo hilouva sum-le-pai tampi jong asen jiu ahi. Hijeh hin hoitah a ingaito leh THEMJIL group a admin ho, adeh a Ronald hi pachat louthei ahipoi.
Tuchan hin THEMJIL group a job notification hung ki-post holeh EIMI TIMES, Hills Today, chule adg. a kon a natoh (kham) kimu tampi umding ahi tan, adang tampi ahung kisep be nahlai ding jong kinep umtah ahi. Chujong leh hiche platform ho’a lolhinna hinnei ho ahung kisodoh a kon a ama le ama kitilkhou tampi jong umding ahi tai. Agom lam in kisei leh THEMJIL a information hung ki-sodoh hoa kon a natoh kimu, natoh muho hetbe na, chule hetlou tampi hetbe mi tampi umding ahitah jeh in apanlah nau hi moh geldao thei ahipoi.
Hijeh hin thil lientah in pan lathei hihlai ujong leh thil neocha seikhamlou a midang ding a pan alah jing nauhi kipapi umtah ahiuve. Ajehchu thil lientah boldoh ding bou hi Pathen kipana ahipon, ijokham kham a thilpha bolding joh hi ahijoi. Ahethem lou mi tampin nuisat hoh-in nei maithei uvinte; hinlah THEMJIL group hi nampi a ding a thil lientah bol ahiuve. Keijeng in jong masang a chu Ronald hi ‘naphat sumang bep nahi’ tia kana houset ji ahin, ahin alungthim kahin hetthem phat in ama kithopi ‘reporter’ dan in kaum doh tan ahi.
Achaina kei a iki tepna nom uchu, Ronald leh aloi ho bang a hi ihi nathei cheh a midang ding a thilpha bolding hi Pathen deisah ahikeo hilouva nampi a ding a jong thilpha hiding ahijeh in thil lientah katong joupoi tilouvin eima hina khambep cheh in thilpha bol’u hite.***

Comments

Post a Comment

Popular posts from this blog

Mukt Shabd Journal: Is it a Fake Journal?

Image
About a couple of weeks ago, I came across two online journals,  Mukt Shabd Journal and Tathapi,  which I suspected to be cloned/fake. When I cross-check the journals with that in the UGC-CARE List, I feel convinced that both would be fake/scam primarily because in  less than four months, i.e. March-June,   Mukt Shubd Journal published 2538 papers; and Tathapi published about 1163 papers during the month of June alone. Let me share my tiny experience with this  cloned/fake journal named  Mukt Shabd Journal . Since I was convinced that the journal could be fraud, I was sharing this for research scholars for awareness. Firstly, whenever you log-in to UGC-CARE List (Link:  https://ugccare.unipune.ac.in/apps1/home/index ), you will surely see a message which says This is to alert all the stakeholders that a few fake websites, imposing as CARE website, have come to our notice. All the stakeholders are advised to be careful and avoid falling prey to these potentially predatory websites. Any
Read more

What have the Meiteis Benefitted through this Conflict?

Image
When the Meiteis started the current ongoing ethnic pogrom against the Kukis on May 3, 2023, little did they imagine that it would stretch the whole year. They have entirely underestimated the Kuki-Zo. Now that the year has lapsed and a new year has dawned, it’s time for the majority community, Meiteis, to assess what they have actually benefited from declaring a ‘national war’ against a minority community.  At the beginning of the war, the Meiteis rampaged the Kuki-Zo (henceforth Kuki) in Imphal and hounded the people like dogs. Meitei society, from all hues, was cheering the Arambai Tengol and Meitei Leepun as they went about venting their deep-seated envy, insecurity and misplaced apprehensions. Biren was even hailed in some corners as a legendary Meitei leader who has gone full throttle to regain Meitei’s ‘lost glory.’ However, as the war went on, Kuki started regrouping after their initial setback when they were caught napping. Soon, the Meiteis intruders were ‘Khamenloked’, signa
Read more

Khangdong ho ding’a kitilkhou nathei tah Bosco hinkho

"Genthei tah a lekhasim toh sumhol kahinkop ahin, tunvang Pathen lungset in business neokhat kabol a kon hin niseh leh Dk.10,000 tobang kamu thei tan hahsa lou beh in sumhol toh lekhasim kakop thei tai.” Hiche thucheng hi Bosco Rengtankhel Jaiche in nikhat Manipur University Campus sung a kaki houlimna lhon a asei ahi. Bosco toh hin achesa kum-phabep sung hin kahung kivop lhon tan, Loi-le-Pai hinan lunggel jatchom chom jong kasei khom ji lhon’e. Miphatah ahi in kahahsat na jouse ah jong eikithopi jing’e. Ham-le-pao kibang aki-hilou vang in sopi Eimi gel hinan kingailu tah leh kisato thei tah in hinkho kamang ji lhon’e. Khatvei vei teng leh ka-insung umdan lhon hojong kaseikhom ji lhon in, loi-le-pai mai mai hitalou in sopi kinaicha bang in kaum ji lhon tai. Bosco hinkho a pachat um kasah tah khat chu ama jong genthei tah a hung seilen a sum-le-pai kihol toh lekhasim hinkop ahijeh in ahithei chan’a chapang-khangdong simlai, adeh a inchen genthei ho ijokham kham a kithopi jin
Read more