Hotel-boy pantoh lekhasim kana kop in; tun aga kane pan tai

Class-XII exam kabol ding laitah a genthei kakisah na pen chu lekha isim laitah leh eihung kikou doh a natoh ei-kipe ji chu ahi. ‘Hotel-boy’ kahi jeh chun lekhasim titah lou school kai jeng jong regular a ana che jou lou kahi. Ajehchu atam jo a Hotel a toh ding hojoh kikhohsah ji ahi. Hotel a natong kahi jeh chun Hotel a glass le plate ho sop, lhong jut, chule adg. hochu kabol ding a kilom in kana gel jin imacha in kana ngaito ji poi.

Hotel-boy kana panna Fast-Food min chu ‘Rebel Fast Food’ akiti in, Nagamapal, Imphal a um ahi. Natong mai mai’a um kana hi vang in kaumna ka-Mahajonpa (Hotel neipa) chun eina lungset in phatdang in kadei bang in lekha simthei hih jong leng Exam ahung nai teng a-Inn lang a room khat eipe jin, hiche a chun jingkah-nilhah lekha kana simji. Class-XII exam lai vang chun natoh na a jaosah lou in exam a din phat-ong eina pe’e. Exam lai tilou phatdang se se a Hotel sung a kigehden ji ahi tai. Kasuhmil theilou khatchu Class-XII exam a ding a lekha kasim ji lai chun Mahajon pa-Unu chun Blank Paper eihin pohpeh jin, hiche hochu mangcha’n Answer jih kana kithemchuh ji. Amin vang kahe tapon, CC Hr. Sec. School a Lecturer pang ahi.

Ka-Mahajon pa chun lungset tah-a eina bol vang chun ama aumlou teng ajinu chun anehna kong-le-bel ho eina sopsah jin, abang kom teng jong leh Bathroom ho eina suhtheng sah ji. Dukan a thil choh ding hihen lang chele-vale nading hijong leh atam jo a chu eina solle ji ahi. Hinlah hiche ho changei jong chun imacha in kagel ji poi. Ahin pasal khat kihi a akisilna anih-apon ho changei sop ding’a eihin sol ji teng kalha ase behseh jin, koima hetlou in kana kapden ji tai.

Pon themkhat gahsop ding kiti chu thil hahsa behseh chu ahipoi; hijong leh pasal khat kihi’a Nu-le-Pa neilou bang a numei khat in hitia eibol jichu kana pohnat ji ahi. Da ding la mi-Inn a kium ahijeh in nomthei kasah jipon, hijeh chun exam kichai kah kithoh ham ham nante tin kagel ji. Ajehchu hiche lai mun’a kaum chu keima dei dan tah-a ana um kahijeh in koima kangoh thei jong ana hipoi.

Hotel a natoh kiti hi Manipur polam ahiteng imacha in akigel pon, hinlah Manipur a vang chu natoh nemnung pen a kigel ahi. Mi abang khat deh deh chun Hotel-boy akiti teng mihem a jong agellou ahi. Hiti ho jeh hin kalung aneo jin milah a lhatdan jong hah kasah lheh ji. Hiche [ghost] hin kahinkho sung ah ichangei hamkhat in lungneo na eina pen tuni chan in lolhin joulou najeh khat in kanei lo tai.

Hinlah kakipa na tah khat chu Hotel a kana umkhompi eimi hochun eina lungset uvin, Hotel a customer atamlou kah dung leh kei tohding jouse atong jiuvin, Mahajon pa hetlou kah in lekha eina kisim sah jiuve. Eimi kana umkhompi ho lah-a kasuhmil theilou hochu Hegin, Obed leh Ginneo (Wakan); Chaoba (Lhungtin); Mangcha leh Chingpu (H.Champhai); kasopipa Thangneo chule adang phabep pi jong ahiuve.

Hiti hin Hotel-boy pantoh lekhasim kana kop in aham ham in Class-XII kahin chai tan ahi. Class-XII kachai a College kaithei ding kahung hitah phat chun Hotel chu kana dalha tai. (Hiche Fast Food chu kadalhah jou phat sotlou lai in akikhah pai tai). College kakai jeng jong chun kalung thim ah kison na ana umpon, lungneo nan kadim jing nalaiye. Ahin Manipur sung a College seitheiloi khat a ana kai kahijeh chun ol ol in kahung chal in BA (Graduation) final year kabol lai a kipat chun service neilou akhoh dan kahin hepan tai. Hijeh chun Graduate Level a bolthei exam ho kahin bol pan in, hiche ho lah a kana bol masatpen chu UPSC-CDS exam khu ana hi.

BA kasim lai chun ka-jilkung ho’u khat in Delhi lang a chedin hatah in eina tilkhou jin, hinlah min ipi asei vang in kisonna himhim kana neipoi. Ahin Jawaharlal Nehru University (JNU) hi India sung’a University hoiloi pen khat ahikeo hilouva paisa jong tamlut louna loi pen ahi atijeh uvin kana try in hinlah Entrance in kana losam tai. Kalungneo nakal a Entrance Test kahung losap kit leh kamoh kisonlal jeng tan lekha aban simbe ding kagel thei tapoi.

BA kahin chai uchun Kajolpa Lulundh in Manipur University a form eihin lahpeh in, kei nop-le-da thu umlou in MA sim din MU kana lut kittai. MA kasim sung jong chun atamjo in kaloihon eina kithopi ji uvin hiti chun amaho kithopi na jal’in kana chal ham ham’e. Kaloiho tampi lah-a M Minthang Zou, MS Haokip, Zamgoumang, L Henjalen Khongsai, Sonkholal Touthang, chule Lalboi Touthang hocheng hi eina kiha thopi dehset ho ahiuve.

MA kasim sung jong chun Competitive Exam ho kabol jing nalai in, hinlah atam jon ka-pass jou jipoi. Ajeh chu hoitah a kigotna nei kana hiji poi. Khatvei tou ka-pass khah jong leh Interview gatou nading [sum] kanei kitji pon, hijeh chun kei ding in pass le fail chu akikheh na aum behseh ji tapoi. Exam ka-passed kham kham ho interview kache jou jilou jeh in lekhasim hatah in kalhahsam lo tan, moh-a kalungneo nakal in lhahsam becheh nan kana neikha tai. Ajehchu ‘Ijatvei ki-pass jong leh phachom lou, interview la kiche pontin…’ tikhat kalungthim a ana chengkha ahi tai. Lekha chu kasim ji thou nan, lunglut na tahbeh aumlou jeh in minung kiphah na ding ahahsa ji tan ahi. Kaloi ho chula neocha cha a eikithopi thei hijong leu munchom a ga-kalson nading chan a eina kithopi jou ding umlou; Ka-insung mite la seilou’a het hikit.

Hiti chun gampam a interview kache jou jilou jeh in Manipur sung a interview touthei ho kahin ngaito tan ahileh hiche jong chu gelbang ana hikit poi. Ajeh chu Manipur a bolthei exam tambeh lou ahi nakal in aum kham kham jong atamlang nehguh-chahguh dimna, chule post tambeh lou na jeng ahi. Hiche nakal hin atamjo contract post, ahilou leh non-gazetted post jeng ahi kitji nalaiye.

Hitichun thanom lou tah tobang in MA kana chai in, IGNTU-RCM, Chingmeirong a M.Phil bol ding kahin gong kittai. M.Phil bolding kahung kigot chun loite phabep toh Entrance kahung tou uvin ahileh kahung lolhing thei tauve. Ahin admission bol nading a ngaicha jouse kaki suhtup jou chan in sumlepai lah nading kahe tapon, kadong man in Kanu kom’ah ‘Lekha aban kasimbe sang in Service kingaito tang’e’ tin kana seipeh tai.

Chutia kasei vang chun Service kingaito nading lampi kahe deh pon, kanu le kapan jong alungthim lhon ah nommo asah lheh hon’e. Imajouse sum umlou jeh mai mai ahijeh chun keidin jong lungthim nopna ahi deh poi. Chutia lhase tah-a kaum nung chun kahet khah mi jong hilou IGNTU-RCM a Clerk-nu (Yambem Sunita Devi) chun phone eihin bol in, aman admission fee Dk.7,500 chu ei-pohdoh peh din ahin sei’e. Form submit na tilou a kimu kha jong kahi lhon lou jeh chun hoija kon a kei kithopi nading lungthim ana nei khah ham kalung adong lheh jeng’e. Chutia ahinsei chun keijong thupha lou in kache in admission kaga kiboldoh tai. Meilhei hikit nalai a chutia Last Date kichai jou chan a admission kibol nathei ding lampi eihin gonpeh chu kasuhmil theilou khat ahi.

MA kasim sung chun College jilkung phabep toh UGC-NET/JRF coaching ah kana kihedoh kha uvin, amaho kithopi hat jalchun NET/JRF kahin muthei kit tai. Kaki hetpi jilkung ho chu Meilhei jeng ahi vang un keidin imacha itlou in abang leh Lekhabu, abang leh Xerox copy ho eihin choipeh jiuve. Hiche ho a chu NET/JRF exam ana kigo kahi.

M.Phil kachai chan a kahinkho chesa atamjo chu mi-kithopi na a hung seilen kahi jeh chun [keiding in aphatna tampi umjong leh] lungneo nan kanei den tan, kalungthim ah kisonna him him aum thei poi. Ahin bolding dang la kanei dehlou jeh chun NET/JRF certificate chu pamai kasah in, PhD bolding kahin gel tan ahi.

Hiche kikah lah ahin JRF Scholarship (amount) ahung kal in ahileh Scholarship paisa tampi free a ache ding chu pamai kahinsah ma ma tai. Hijeh chun scholarship del nathei ding lampi kahin ngaito tan; hinlah admission ding kana neikit tapoi. Hiche phat chun kaloipa Ronald Sitlhou in admission eihung bolpeh in, Meilhei jilkung ma ma khat supervisor ding in kahin kilhen tai. Hiche ka-Professor pa hin kalungneo ahet jeh in eilungset lheh jeng in phatseh in ei-tilkhou jing’e.

PhD kabol tah vang hin kalungneo na pa hi kada lha thei pon, phatseh in kigelnan kamathah den ji. Loile pai atamlang toh la phatseh in kaki muto jing thei tapouvin, kalung athomhao lheh ji’e. Hinlah kahetlou kah in loile pai phatah tah phabeppi kahin neidoh kittan, kaloi ho khel a kaloiho ahung hidoh kit tauve.

Tu tadi hin khonung ding tohgon imacha kanei hihlai in, hijeh hin Scholarship lhaseh-a akimu pouleh aphaset ahi tai tin kagel ji. Ajeh chu Hotel-boy pantoh lekhasim kahinkop a hahsa tah a hinkho kahinman chu aga kaneh pan ahi tai tia kigel kahi. Chuleh ahithei leh JRF a pat in SRF jong kikai sang thei nalai leh kanom lheh jeng’e.

Thuchaina: Phatseh a kalung aneo a kei le kei kaki lhaset ji vang hin khatvei kom kom teng hoitah a kagel jileh kachung a thil lhungji hohi Pathen gonjoh ana hikha dem tin kahin ngaito ji. Delhi a lekhasim a kana chejou lou, Interview che nading paisa kanei jilou ho, chule tua bolding hetlou man a PhD kabol ho jouse hi kagel hoisel leh keima deilam hilou a ama deilam a eipui khat umdan in akilang ji. Ajeh chu kahinkho chesa ho hi kanung gel teng kalung kimlal lheh ji vang in alosam mong mong jong kahi nai poi. Hinlah hiche hohi lunggel mai mai ahi jin, hoija kon ham tijong kahe deh poi.

Keima hinkho a kon kamudoh, khangthah hon igel diuva kadeisah, khat chu: ‘Ithohhat phot leh Pathen in achate donlou in akoi ngaipoi’ tihi ahi. Chuleh boina khattou jeh a [Lekhasim leh adg.] ilhahdai khah uleh ka-nopsat kon ahi tai tin gel’u hitin athah in kipan phakit ji leu hen Pathen lunglam jong hiding ahi. Ajehchu mi atamlang hi lam lhung ding ahi kon’a hung kinung le hikha ji ahi. Hijeh chun Thohhat phot leuhen ilolhin nau thusim iseiphat-u hung um teiding ahi. Hahsa nakisah kei vang a hi mi-nih mi-pon changei nasop khah loulai ding ahi! Hiche hohi masang chun kana jachat pi jin, tunvang imacha in kagel tapoi. Hijeh chun ijemtia akiseipha a eigel khattou aum khah leh ‘aki seipha ma kahi’ tin kagel’e.***

(VoTH August 2015)