Kum-10 sung’a Saikul Exam Centre hung kikhel dan

Sadar Hills East tia jong kihe Saikul hi aki minphah teng thilphalam sang’in aphalou lam, tichu Matric Exam, Lampi, chule Thingnoimi toh akivetchep nom ji. Achesa kum phabep masang chun Ganja hatah in ahung minche in, tuhin Ganja sang’in Kani (Kinepna-pahcha) ahung kiha seijoh kit tai.

Thingnoi thu hi 2008 kum’a Kuki thingnoi holeh solkar in Suspension of Operation (SoO) ana kai uva pat hatah in ahung khenem tan, thingnoi jeh-a micham-milham genthei thoh jong ichan hamkhat in ahung khenem tai. Lampi (Imphal-Saikul road) jeng jong tu-tua MLA Pu Yamthong Haokip in hatah a ahin boipi toh kilhon in atam lang Black-top akiloi tan, kumkit lam a pat Saikul lampi hi kiha sei melset talou din kinep aum’e.

Achesa kum-10 sung’a Saikul Exam centre hung kikhel dan:

Saikul Exam centre hi ‘Note’ kibolna mun ahi tihi Manipur muntin a kihe, kisei jing khat chu ahi. Kum-10 masang chan chun Matric exam pass le pass-lou hi hand-writing a kingam dan in ana kisei leuve. Ajeh chu Board (BOSEM) ho ahung lou poule vet a kijih jeng thei ana hi.

Hitobang dinmun anahi hi aphatna (merit) tampi umjong leh aphatlouna (demerit) ana tamjo ji. Hijeh hin Saikul gamkai mi titah lou eimi ahepha chan in apona in, koiman la imacha alothei deh ji poi. Ahideh in Saikul exam centre a hung khanglen khangdong ho pohnat dan asang dehset-ji.

Saikul centre a Matric kahin chai nahi kum-10 ahung val tan, itih tah teng Saikul exam centre hi Manipur titah lou vannoi gamtin in aphalam a ahet a akipapi thei khat ahung hidem tin kana ngaito jing’e.

Ipi kisei jong leh Thingnoi ho letna ahijeh in Civil Society leh Student Organisation ho ding in jong alonaje umlou tobang ana hi. Minu-mipa ten jong gamsung phatding deilheh jong leh chate exam pass ding joh ana thupisah ji jeh in kikhelna ana umthei him him poi. Hitobang dinmun a lekhasim khangdong ho ding in kihambol sang in abailam a exam pass ding chu thil hitheipen dan in ana kilang jeng ji’e. Hiche hi chance lahna a nei a exam lai leh sum kihol jilkung jong vatji lou ahi. Kon ipi seijong leh achaina chu abep ahi thou thou jin sei hahsa tah chu ana himai tai.

Pohnat jeh in 2008 kum chun KHOHUI magazine ah Saikul exam centre vetup thei ding hi Thingnoi ho tilou aumpoi tin kana seiye. Ahithei le bon phaicham thingnoi, adeh-a KYKL hon, abol bang khun note bol ho chu akhutphang ham akeng ham kappeh jeng uleh hung phathei din khohsah val jeh in kana seidoh kha’e.

Hinlah vangset umtah in Matric Exam a note kibol vetsui tah sang in Vannoi in ahet khahlou “Special Room” kiti khat 2008-09 vel chun ahung umdoh tan, 2011-12 vel chan chu kum phabeppi ana kijompeh-e. Special Room kiti hi Saikul gamkai a thunei hon aphatsah candidate ho ding’a guhthim’a kigong ji ahi in, hiche room a exam tou ho chu Board ho ahung jeng jong leh ki-suboi jilou ahiuve. Exam kipat a pat akichai chan jilkung themcheh phabep in Answer ajihdoh peh uva jihdohsa Answer chu aki-copy mai mai jiu ahi. Alhangpi in Special Room a exam bol ho chu bailam tah in First Class ahi jengthei jiuvin, hijeh hin aboltheijep jouse din paisa pehna alhah jong leh peh-a luttei ding chu deisah ana hiji.

Hiche kikah lah ahin Manipur gamsung ah Matric ‘Direct’ a kibol khat ana umdoh kit in, hiche huinun chun Saikul jong hatah in ana mutpha in ahi. Saikul a matric exam bol ding akum-akum in ahung kibe jing tan, alhangpi a Saikul a Matric exam bol 600-700 vel ana hiji chu 2011 kum chun mi-1500 vel ana phajou in ahi. Chujong leh Manipur pumpi a Matric candidate tam nei holah a ani naleh athumna chu Saikul area school ho ahung hijou tauve (Hinlah regular a kaichu masang a jatbep ana hi nalai’e). Direct a exam bol hohin School a paisa themkhat apeh uva adeina muncheh a school hungkai uva Matric bou ahung pehjiu ahi. Hiche phatlai chun Matric exam laileh Saikul hi Khoppi kibol abangji ana kiti.

Kiseibe nalai leh Model English Higher Secondary (exam centre) ahin exam laileh Dinning Hall gei in exam hall in akimang ji’e tin ana kithang’e. Thulamleng hijong leh exam centre khat a candidate ajatni a ahung kibe leh ahithei nading lampi umthou ahi. Hitobang deilou umtah thusim hi school bol hon ‘quality education’ sang’a Paisa (sum-le-pai) adeijoh jeh le agamkai a thunei-vaihom ho natoh phalou ahipen’e. Exam centre ahivang in Model School a hin school bang in Direct a exam bol hi aum khapoi; hiti ho hi sum ngailud jeh ahibouve tin School Secretary-pu in kaki mupi nakhat a eina seipeh-e.

2012 kum’a ‘U-Turn’ ana um:

Vangsetna chung’a vangphat tiding himai intin, 2012 kum chun phaicham a simlai kiloikhom DESAM leh thingnoi kiloikhom KYKL in Direct a exam bol umsah talou din Board ho ahin gih lhon tan ahi leh Direct a Matric exam bolding candidate 7000 vel chu Board in exam bolthei lou din ana phongdoh tan ahi. Hiche simlai 7000 ho lah a hin 1000 tobang chu Saikul exam centre a bolding ho ana hitauve. Chule munchom chom a lekha hinsim a Saikul centre a exam bolding kisa hochu atam lang Meilhei, Kol-le-vai hijong leh Eimi tampi jong ana jaokha tauve.

Alang khat a hiche kum’a kipat hin Saikul exam centre a ‘Special Room’ jong aum tapon, exam bolding jat jong masang a jatbep ma ahung hikit tai. Masang a Khoppi tobang ana hiji chu hiche kum’a exam bol talou hoding chun lhaset-muisetna joh ana hikha tai. Hiche thu ahin Model School Secretary-pu in ‘hiche jong hi sum ngailudna jieh’a ana umkha ahi’n, tukum’a pat ki-umsah talou ahi’ ti’n eina seipeh-e.

Kipa umtah khatchu a-gamkai a um thingnoi hon KSO-Saikul Block in exam phatah a avetsui din thupeh ahin nei tauvin ahileh hiche kum chun ichangei ham in exam kiboldan ahung hoi tan ahi. KSO-SB lamkai khat kahoupi na achun “KSO in pan nasatah in akila in, 80-90% tobang aki vesui joutai. Hiti’a exam strict tah’a akibol jieh in mitampi muda zong akichangtai” ti’n eisei peh in ahi. Chujong leh school secretary ni(2) leh Principal khat jong kaga kimupi in thil kikhel dan chu eina seipeh cheh uve.

Hiche kum’a exam bol phabep jong kana houpi in simlai khatchun hiti hin aseiye: Gate a volunteer hon mi tahsa phatah in a-check jiuvin, koimacha note polut aum tapoi. Hinlah asung a guhthim a ki-vetto peh vang aum nalaiye; chule mikhel a exam bol (impersonation) vang khatcha aum tapoi.

Hitia kikhelna sangtah ahung umtah phat chun Laijon Digest magazine (March 2012) ah Editor Pu Jampa Lhungdim toh kitho in article khat kana sodoh lhon in Saikul Matric exam in U-Turn abol’e tin kana jih lhon’e. Hiti hin muthei changtah in kikhelna umjou hihjong leh ol ol in ahung chal in, Saikul exam chu exam tah tah ahung hipan tan ahi. Hinlah Result ahung kiphon jou a hiche Magazine ma ma hin Sadar Hills sung a exam centre ho survey ana bolna achun result (pass percentage) kumdang a toh hatah a akikhehna aumlou dan kicheh tah in ana tahlang’e.

2015 leh 2016 kum’a muthei tah a kikhelna um:

Phat ahung chal in, KSO-SB, themjilna khohsah Nute/Numeite ho, chule kiloikhomna dang dang ho kitho khom in pan ahin la jing uvin 2015 kum vang chun muthei tah in result ah kikhelna ahung um tan ahi. Exam strict tah a ahung kibol toh kilhon in Class-XII exam result chu kumdang a toh banglou tah in ahung khenem tan, pass percentage chu 16% (approx.) vel anahi. Hijeh hin ningkum a EIMI TIMES (May 16, 2015) a kana jih article khat achun detail deu in kana sei in, KSO-SB jong pachat dia lom ahidan kana tahlang tan ahi.

Hiche banjom hin tukum (2016) exam chu ahung phajo cheh kittan, themjilna ngailu jouse lungthim a lungkimna ahiding tahsan aum’e. Council (COHSEM) in exam centre phabep a CCTV koiding tohgon ahin nei nalah uvah Saikul centre jong ana jaokha khel khel tan, masang a ana kibol khalou hijong leh tukum Class-XII exam chu Camera recording noi a ana kibol tan ahi. Room jouse a CCTV aum tah jeh leh KSO-SB makai na a exam phatah a vetsui ahung hitah phatchun candidate jouse acham in note bol aum tapon, exam chu hoitah in ana challha tan ahi. (Sawombung centre a vang chun exam kipat niding jingkah in CCTV jouse ana veilha uve).

Chutia Class-XII exam CCTV toh kitho a hoitah a vetsui ana hi toh kilhon in tukum Saikul centre a Council exam result chu kumsot a melchih thei din ana umdoh tan ahi. Saikul centre hopsung a Higher Secondary School hi ni(2) bou ahin, hite ni lah-a Thangthong Higher Secondary hi Government School, chule Model English Higher Secondary hi private a ahi.

Saikul Centre HSE (XII) Result 2016:

Name of School	Appeared	Pass	Pass %
1. Thangtong Hr. Sec.	201	NILL	NA
2. Model Eng. Hr. Sec.	46	2	4.35%

Class-XII exam a CCTV kiman chung chang a hin lunggel tampi ana umdoh in, aphatsah loi tampi umjong leh lungkimlouna nei jong mi phabeppi ana um’e. Ashat Chongloi in angaidan apehna khat achun: Saikul gamsung mite hi CCTV jong mukhalou lai tobang jeng aki hi nalaiyin, hitobang lah-a CCTV hung kikoi hin Class-XII exam bol ho titah lou Matric peho changei mentally, psychologically, physically a asuhboi phah ahi. Hijeh a hi pass percentage hibang’a nem ahi. Aman aseibe na ah, Exposure lhasam nalai ihiuvin, ijat kisei hen, chapang thepmo jeh ahi ti jong leuhen adihna chanchu um nante. Hinla ahet ho geija jihdoh thei louva CCTV wave in asuhboi phat uva result hi hiti ahi kitile seikhel hiponte.Hitobang a seichah thei ding khop a mi-247 lah-a mi-2 bou a-pass hi jachat umtah ahi tia lahthei ahi. Pass percentage 90-95% cheng ana hiji a, 2015 kum’a 16% vel, chule tukum’a mi-2 bou ahung pass hi suhmil louding khat ahi tai. Hiche chung chang a hin KSO-SB President-pu in “Tu tadi a hi pass percentage anem chan’a ikipa diu ahi mai’e” tin eina seipeh-e. Suhmil theilou khat chu Senapati DC, Jacintha Lazarus (IAS) hi themjilna lam hatah a khohsah khat ahin, ama jal’a jong ichangei hamkhat a Saikul exam centre suhtup a hung um thei ahi.

Classs-XII exam a CCTV akikoi vang in Matric a vang chun ana kimang pon, ahin KSO-SB, BOSEM Flying Squad (Team) khat le Micro-Observer khat kitho in Exam chu vetsuina ana um in, hoisel in ana chelha kit-e. Saikul centre a ding a Board thalheng’a Observer a hungpang khat seidan in ‘Tukum Saikul exam hi cent percent hihih jong leh atheng vang chu ahi tai. Lunglhai aumlouna khat vang chu Invigilator hija student ho guhthim’a note bolsah khatle ni ana um jap jap jin, ahin Observer group thum in strict tah a kivesui ahijeh in koimacha note aki bolsah tapoi’ tin aseiye.

KSO hon strict tah a pan alah jing lai uvin mikhel a exam bolding kisa mi-15 vel matdoh in ana um in, hitiho chu admit-card lahpeh ana hi tauve. Thulamleng kija toh abah le observer hon note amatdoh phabep ana um in, hinlah copy abol masang uva kimandoh ahijeh in khankho in ‘expelled’ lom vang ana kibol pouve akiti. Hiche hi ivet leh apha lheh tai akiti jeng vang in 100 percent vang chu hijoulou lai tina ahi.

Tukum KSO-SB in Matric result kiphon jou’a data ahin pehdoh dung jui in anoi a hin Saikul area school ho performance ana veu hite. Saikul centre a HSLC Pass percentage hi 24.96% vel ahi in, hiche hi Manipur pumpi a pass percentage 65.37% toh vetkah ding a hatah a nem ahi. Ahin hiche jong hi External hotoh kigom ahijeh a hichan hi ahin phah ham ham ahi nalaiye. Hetthei khat chu district-wise a vetding a Tamenglong hi asangpen ana hin, Pass percentage 82.59% ana phajou’e.

Saikul Centre HSLC Exam. Result 2016:

Name of Schools	Appeared	Pass	Pass %
1. Christian Eng. H/S, New Saikul	25	14	56%
2. L.L. Henjou Eng. H/S, Thangkanphai	18	10	55.56%
3. De Paul School, Molkon	29	15	51.72%
4. V.M. Nazareth Eng. H/S, Gangpijang	74	34	45.95%
5. GS Public School, Shongthu Avenue	77	32	41.56%
6. L.M. Eng. School, Saikul	49	17	34.69%
7. Model Eng. Hr. Sec, Saikul	72	23	31.94%
8. Songphel Khulen H/S, Senapati	18	02	11.11%
9. SNGC Memorial Eng. H/S, Molkon	40	02	5%
10. Thangtong Hr. Sec., Thangkanphai	220	09	4.09%
11. Awang Longa Koireng Govt. H/S	11	NILL	0%
GRAND TOTAL	633	158	24.96%

Source: KSO-Saikul Block 

Achung a kipe school ho lah-a De Paul hi Saikul gamkai a um hijong leh a-exam centre hi Imphal ahin, adang school-10 ho vang hi Saikul centre a pejeng ahiuve. Geldoh thei khat chu 2011 chan a chu school ho a Matric pass percentage hi alhangpi’a 90% vel ana hiji ahi.

Tukum Saikul centre a exam bol School ho lah a-performance hoipen chu VM Nazareth English High Sschool, Gangpijang hi ahije. Pass percentage in asangpen hijou hih jong leh a-pass jat tampen ahikeo hilouvin First Class tam pohdoh pen leh Letter Mark tamnei pen ahi. Chule hiche school apat Gl. Thongkhotin Thang Kipgen chun Subject thum’in Letter mark ana mu in, adang thum ma achun 70 chunglam cheh ana mu kit in hitoh kilhon hin asangpen ana hi’e. VM Nazareth ban’a Good Samaritan Public School, Shongthu Avenue hi ahi.

Thuchaina:

Achung a hung kisei bang hin Saikul gamkai ahin achesa kum-10 vel sung hin muthei tah in kikhel na tampi ahung um tan, hiche hi aphalam a ahung chejom jing ding kinep aum’e. Saikul Lampi kisemchai vah ding ahi tan, thingnoi-suongnoi jeh-a kichat-tijatna jong hatah in akhenem tai. A-gamkai a kiloikhomna hon jong khantou-machalna (development) lam hatah in ahin khohsah pan tan, masang a bang talou in mipi ding in lungmong tah leh kihol tah a chending lunggel aum pan tai.

Hijeh hin tua phatlam in amano dan hi achejom jing leh ‘Quality Education’ keo hilouva ‘Education Tourism’ changei chepi thei ahung hiding kinep aum’e. Saikul hi thil jatchom chom a ana minchesa ahi tan, hatah a quality education pohdoh ahithei teng Education Tourism kiti jong hi hung hithei ding thilkhat chu ahi. Kum-15 vel masang chun ‘note’ jeh in muntin a kon lekhasim ding ahung kitol jin, hiche bang a hi quality education jeh a jong min ahin delkit thei ahi. Phai apat gamlhatah a um Don Bosco College, Maram bon North East pumpi a college lhendoh thei khat ahileh mun naicha a um Saikul jong Manipur sungkah beh a hetthei khat hisahmo ahi poi.

Saikul gamkai a quality education ahung umdoh thei nading leh thilpha lam a Saikul hi mi hetthei ahung hi nadin KSO keo hilouvin Kuki Inpi a kipat kiloikhomna jouse, School authority hole jilkung (teacher) ho, chule agamkai mipite jousen mopohna lientah inei uve. Themjilna khohsah Eimi jouse, adeh in Saikul gamkai mi lekha simsangna neiho leh official jousen Saikul exam centre ahung kitup ding hi adei a atosot sohkei ahijeh in KSO hon jong lungngam tah a pan ilah diuvin iki tiem uve. Gl. Thangkhochon Haokip, MPS (Police Officer) in exam lai in villhah na aga nei in; Pu Dr. Thongkholal Haokip, JNU (Delhi) leh Academician/Intellectual tampi in jong result kiphon chun social media dung’ah hatah in ana samphong uve.

Alangkhat a Saikul centre in phatlam amano lheh tah vang in Sadar Hills West hopsung a um Exam Centre ho a vang Saikul a tobang in kikhelna muthei tah in aum naipoi. THEMJIL (Facebook Group) report dungjui in Kanggui Gamkai a school ho pass percentage chu 86% ahin, Kangpokpi Hr. Sec. School (7.31%) tilou school dang ho pass percentage chu 80% chunglam ahisoh keiye.

Tuphat hi ivet leh Saikul centre seh seh hilou in, Sadar Hills pumpi leh Eimite chenna mun jouse a guchat system hi suhmang phat mong mong ahi tai. Hiche nading a hin milham ho keo hilouvin a-gamkai ho a kisonpi umtah organisation hon jong Student Organisation ho hatah a itosot diu deisah ahiye. Mipi in athunnun pen ihiuvin, ithanei nau hi thilphalam a imanchah diu hi thilpha ahi. Tukum HSLC Exam a Tahchanu-Tahchapa mi-3 jen topper lah a ahung pan thei leh Saikul centre a jong hung ummo ahi poi. Kum phabep masang chun MIL (Nepali leh Thadou-Kuki) a Subject Topper ana umkha tan, adang a jong hung umthei ahi. Saikul gamkai miten tua kikhelna hi lhaso lou a ijom jing uleh sotlou’a aga kine pan ding ahi tai!***

(Article written for VoTH, June-July, 2016)