Manipur sung’a Zudon khamtah lou ding?

Tu-kahlah thuso ho a hatah a hung kisei Manipur a Zujoh-Zudon ana kikhah (Prohibition) lahdoh tah ding kiti hi Sumkolvei mi ho titah lou Zudon mi jouse dia thanop umtah khat chu ahi. Chuleh Chief Minister Okram Ibobi Singh jeng in jong ‘Manipur government in State sung’a Zu phal tah ding lunggel akinei-e’ ati ahijeh in athu hi ngaito thei tah khat ahi. Manipur a hi RK Ranbir Singh CM hilai 1991 kum a kipat a Zu ana kikham ahi tan, tuchan in ache jom jing nalaiye.

Manipur Innpi (Legislative Assembly) Monsoon Session toukhom na a NCP MLA L.Ibomcha Singh thudoh ana donbut na achun Finance Minister portfolio jong tuh CM Ibobi in Manipur sung’a mipi atam lang hin Zu phal tah din deisah na anei uvin, hiche hi income hoitah hiding ahijeh in government lunggot lam jong ahi tin ana seidoh-e.

India hi ivet leh Zu kikham nahi Gujarat, Manipur, Nagaland chule Lakshadweep bou ahi tai. Mizoram hin phat sotpi ana kha nung niengkum 2014 achu khah jou talou a ana lahdoh ahi. Nagaland a hi 1989 kum’a kipat a [Zu] ana kikham ahi tan, akhamjou deh pouve. Akhuti leh mi atamjo Christian hina state Mizoram inbon Zu aphal tah a, Nagaland a jong akikham joulou leh Manipur in jong ahin phal tei ding hi ginchat ahi. Manipur government in masang a pat ‘Prohibition’ hi lahdoh ding lunggel ana nei ahi tan, NGO holeh Civil Society Organisation (CSO) hon hin nielkal khan te tijeh a lhangphong tah a ana pohdoh lou ahi. Adeh in khamnathei douding mong mong a hung chomdoh AMADA, CADA, Nisa Bandh, Meira Paibi chule Local Club hon hatah in pan ana la uvin, ahin tuhin athip gam tauve.

Manipur hi amin a Zujoh-Zudon kikhamna (dry state) ahi vang in ajoh ding hon ajoh thou thou uvin, adon ding hon jong adon da deh pouve. Manipur University a Professor Amar Yumnam in aseina achun ‘Manipur sung a Zu akikha vang in Zu jat kimkei in mantam tah tah in akimu soh kei’e’ tin ana seidoh-e.

Alang khat ah dry state ahi tah jeh in Zu hoitah tah (branded) ho deibang in akimu tapon, hijeh hin branded hilou (Zu hoilou) joh hon sumkolvei nopnan anei uvin Zudon hon jong hiche ho hi adon gam tauvin tahsa damtheina lam suboi tah khat ahung hidoh tai. Ibobi in aseina achun branded ho ahung lutthei tahlou jeh in Zu hoilou tah Khatkhati (Assam) a kisem Zu hon Manipur athulha tan, ahoi lou keo hilouvin mantam tahtah in akijoh kit-e atin ahi.

Hitobang dinmun ahitah jeh hin Zu joh hi kiphal kit taleh Manipur Government ding a Income hoitah ahikeo hilouva Zudon hon jong branded Zu ho adon thei diu, hichu ama ho ding a ichangei hamkhat a tahsa atohkhah louna hijo ding ahi. Chujong leh Zu joh hi akiphal teng ajoh hon jong aman chet in joh uvin tin, hichu phatseh a donho ding a sum tampi ‘save’ na hiding ahi. Hetding khat chu Zusan hohi aman sang a jatni-jatthum a tam a kicho ji ahin, Zujoh hi kiphal hita leh aman jat chet bou a kicho thei ding ahi tai.

Alangkhat a Zu hi kikhah lou hileh Manipur a pat Zukha (Akangte) hi gamchom a thotdoh a sum tampi pi muna a pangthei ahi. Ibobi thusei hi tahsan ding hileh Manipur a Akangte (Sekmai, Andro, adg.) hohi gamchom mihon adei thei lheh dan’u ahi.

Tripura hin kumseh leh Zu a kon sumtong dk.400-500 crore amujing in; Tamil Nadu khun dk.25,000 crore chan amu jou’e akiti. Hiche hi ivet leh Manipur in jong kumseh leh Zu a kon dangka crore tampi pi amujing thei ahi.

Achung a hung kisei hi ivet leh Manipur a Zujoh kiphal lou jeh in sum tampi amang in; kiphal hen lang hileh ichan hamkhat a sum le pai dinmun (economy), damtheina (health), chule adg. a khantouna umchom ding ahi tihi aching-athem tampi lunggel ahi. Among a akikha vang a akikhah lou toh thakhat ahijeh in Prohibition lahdoh jeng a pha khat chu ahi. Tua hi Government in Prohibition aum jeh a kai-le-don (Tax) dongkhom thei lou, police leh akikah a kipei mi phabep sumguh nehna bep a pang, chule adon hon jong mantam tah tah a akichoh-u ahi.

Eiho dinmun: Eimite dinmun toh vetkah ding hileh Zu phalding tia hung kisei hi thil hahsa tah ahi. Ajeh chu Pathen thu a ikihil dan hou ivet teng houkhomna atam lang in Zu hi chonset lenpen khat in agel’e. Chujong leh tahsa lamdol a seiding in Kho kivaipoh na atam lang in Zudon (Zu le sa neh) hi lutah in agel in, Vohchal tuh-nga chan’a leo nathei khat ahi.

Hinlah ivet thuhjep leh Manipur a cheng Nam ho, adeh a Kukite (Eimite) hi akhang-akhang a Zu hindon te ihiuvin, Pu le Pa chondan ngaina a kin jouse a Zu mangcha te ihung hiuve. Tukhang in Chabel in khel tajong leh tohding-thamding jouse Zubel jaolou a ana chejeng loute ihiuve.

Alangkhat a ivet kit leh Houlamkai hon Zudon hatah a akham vang uvin adon alhom chom deh pon, khohset na joh a inei dan uvin akilang’e. Houbung abang deh deh chun Zudon ho ‘Discipline seat’ (‘Vet-in’) akoikit jin hiche jong hin hatah in Zudon apunbe sah dan in aum doh tan ahi. Vet-a umding kichat jeh a Zu donlou (ahilou leh guhthim a don) jong tampi umnante; hinlah hiche jeh a hadon joh hi tamjo din aum tai.

Thilkhat hi imacha hilou dan’a igel teng aboina aum pon, chonset lientah dan a igel vang uhin khangthah ho lungthim ah donnom na lungthim ape jo tai. Chule Zudon kipan til khat chu Vet-a ahung umteng Vet-a aumkhom pi ding ahin kihol jitan, hiche jong hin ichangei hamkhat in Zudon akibe sah in ahi.

Hoitah a igelleh Eimite lah-a Zudon atam hi i-chonnau (tradition) a hung jaopeh ahijeh in ase a gelthei behseh ahipoi. Hinlah Christian ihung hi uva pat Houlamkai hon hatah a ahin kham’u thil ahijeh a bou ase a kigel a, chonset a akigel tahjeh a kingolsah na a don’a addict che tamdoh lo ahi joi.

Zu hi aphatna isei jong leh atam in; asetna jong atam’e. Hijeh chun Manipur government in prohibition hi ahin lahdoh masang a Houlamkai holeh Civil Society Organisation hon adonbut nading iki semtoh diu deisah ahi. Ajeh chu ‘Bible in Zudon aphal poi’ ahilou leh ‘Zudon ho Vangam lut louding ahi’ tia kihil nahin tulai khangthah ho [atamlang] Zu a kon ahoidoh sah ding tahsan aum tapoi.***

(Niseh Thuso Hills Today a so ding'a kijih ahi)