CCPUR BOINA: Lha-ni ache tah vang’in boina meipi bang akinong jing nalaiye!

Tukum 2015 August 31 leh September 1 nikho thilsoh a kon khangdong mi-9 in Nampi a ding a ahinkho ana phal uva; adang mi-60 val ana kitoh khah jou apat Lha-ni ahung val tan, hinlah tuchan in boina meipi bang in ajing jing nalaiye. Ahinkho analiem ho Luongdamsa Churachandpur District Hospital Morgue (Thikoina Inn) ah aum jing nalai in, boina in la phatlam amano thei deh naipoi. Hiche pihi ahinkho ana phal ho Lha’in hin ve leh ipi agel diuvem?

Chutobang a-itih a suhmil hoi hita louding nikho chu inung vet leh hiche phatsung hin thilsoh tampi jong ana um tai. Newspaper, Magazine, chule thuso dang dang ho titahlou Social Networking leh platform dang dang ah lunggel seikhom na simsenglou ana um tan, tulang hin mipi lungthim a daijep jep dan in akilang tan ahi. Itobang dinmun chu hita leh Nampi a ding’a ahinkho ana phal ho Jaana sangpen ipeuvin; hichan chan a thoh hahsa tah hinthoh aumtalou ho Insung mite leh thil jatchom chom a pan hinla toupeh ho jouse jong pachatna sangpen ipeuve. Hiche Article neocha ahin Lha-ni sung a ana soh thil ho lah-a suhmil louding thil phabep velvet na ana nei-u hite.

PHATLAM AMANO NAHO

Tahchapa mi-9 jen in Nampi a ding’a ahinkho ana phaldoh uva kon in Namsung ah thilpha tampi mudoh thei in aum tai. Hijeh hin phatlam amano na hohi hinveu leh Sopi cheng hin adalhah (ahing nalai) cheng ho hi hin pahcha lheh uvin te. Thil tampi lah-a athupi pen chu Eimite lah titah lou’a Tribal jouse ding a kipunkhomna (unity) ahung piendoh thei hi ahi. Amaho thisan jal’a ‘Tribal Unity’ kiti hi kisamphong thei ahijeh in athiho “Tribal Martyrs” tia kumseh leh nikho khat nitding kiti chun kilomtah a jaana ipehnau ahi. ATSUM jeng jong ni ana kiso a khat-a kipunkhom theilou a phat sottah ana umchu tuhin aki punkhom thei tan, kipa umtah ahi. Hiche ho jouse hi Eimi ho a ding’in thilpha ahideh set-e.

Kum ijat hamkhat dinkhat a ana dingkhom thei lou KNO leh UPF dinkhat in ading khom thei tan; Political Demand jong kibang a nei ding tin phondoh na ana umtai. KNO President Pu PS Haokip leh ZRO President Pu Thanglianpau Guite lamkai nan Thikoina Inn’ah aum talou ho luongdamsa Jaana pehna jong ana um tan ahi. Hiche keo jong hilou in KNO-KNA leh UPF-UKLF in kithokhom a pan lakhom jing tading in October 24, 2015 nikho chun Tengnoupal khomun a kipana maicham leh an-kuong sokhomna kin Kuki Chief Association, Chandel tohgon na in KIM, KSO chuleh Houlamkai ho jaona in ana mang uvin, hiche nikho hi kumseh a ‘Reformation Day’ tia nitjing ding in jong ana phongdoh tauve. Hitobang a pankhom ding hi mipi in kum ijat hamkhat ana galdot jing chu ahi.

Amaho keojong hilou in Nam sung’a kiloikhomna (thingnoi leh civil organisation) jousen athiho ana pona sohkei in, ama-ama hithei na cheh in pan ana lakhom uve. Hiche jong hi Martyr anachang mi-9 ho jaana ipeh nau khat ahi. Christian Hospital, Imphal a KSO-Imphal makai na a Student Organisation hon Help Desk ana hon na seh seh uva kithopina ana pelut chu changval leh kiloikhomna chom chom agom in 485 ana phajou in ahi. CCpur Hospital mun’a kihong JPO Help Desk leh adg. a jong kithopina aniseh in alut jing’e.

Sum-le-pai titahlou in munchom chom a Taokhomna aum jing in, Houbung level leh society level titah lou in jatchom chom in Pathen kom’a Taona ana kilhut jing in ahi. Pan ilahkhom nauhi Manipur sung sehseh ahi pon, India khopi munchom chom a umho leh Vannoi (Foreign) gamchom chom a umho a kon jong ahi. Israel, USA, South Korea, Singapore, Malaysia, Europe, West Asia, chule gamdang dang a kon leh India sung munchom chom a kon’a Moral leh Monetary support, chule taona ahung jing thu ana kija jng’e. Hitiho jouse jal hin thina theichan boina ana sobe tapon, akitongkha hojong aban ban in ana damdoh soh tauve. Hiti ho jouse hi ivet leh dinkhat a ihung dinkhom uva sumlepai, thalejung, chule thil jatchom chom a pan ilahkhom theinau hi Nampi a ding’a ahinkho ana phaldoh Martyr ho thisan jal ahi in, hitia ikithokhom nau hi ama ho jaana ipeh nau jong ahi. Hijeh hin sumlepai, thalejung, chule neilegou a pan ana laho jouse pachat umtah ahiuve. Adeh in asun-ajan a Thi-op a pangho ahin, niseh leh Kiphinna a pan lakhom ho leh JAC, JPO chule Nam sung a kiloikhomna jouse suhmil thei ahipoi.

Hinlah dinkhat a idinkhom jeng tah vang uvin thil jouse aphalam a che ana hidehsam poi. Aphatna sang in asetna lamjoh in alotdan in akilang in, hiche hi pohnat umtah khonung a ding’a tijat umtah ahi. Ipijeh a tijat umtah ahi itiu ham tihi anoija point phabep ana veu hite.

MIPI LUNGBOI NATHEI HO

August 31 nikho a kipat thil hungche dan hi ivet leh mipi lungboi nathei thil tampi ana soh tan, tuchan in lunggel kicheh na aum thei naipoi. Hiti ho jouse lah a lungboi um pen chu ikiphin nau hin hoilam ajot kigot hitam tihi ahi.

Ikiphinnau ahung kipat chun National leh International Level changei ah News Coverage hoitah in ana um in hinlah alamkai ding pen umlou bang in thuso abang ah “Sixth Schedule”, abang ah “Separate Administration”, abang kitma achun “Bill thum ho nung lahdoh ding” ti ana hi. Hitichun News Reporter ho jeng jong ithil ngaichat pen’u hethem theilou bang in ana um uve.

Chomkhat jouvin ol ol in ahung chal in ikiphinlona pen uchu “Separate Administration” dan’in ahung kilang tan, chenkhompi Nagate toh jong kilungtoh tah-a pangkhom dan in ihung umdoh tauve. Ahin Separate Administration kitichu tuchan hin ipi ahi kicheh tah in hilchetna aum pon, Sixth Schedule ham, State within State ham, ahilou leh State pilhing idel’u ham aki hethei tapoi. Asunglam a eiho iboi chetchut kah uvin chenkhompi Naga ten jong amin’in “Tribal Unity” aminput sah uvin amaho political demand joh akhohsah dan uvin ahung kilang pan tai. Chule eimite lah ajong State thu ahung kiseipoh jap jap kitjin, anung-ama la aum kitji poi.

Tuchung tosetna chungchang a ana kisemdoh JAC chaloh dan ivet jong leh ahung kipat til apat adeitah a chatloh theilou bang in ahung umpeh in, athil deichat pen jong hetdoh thei in aumpoi. Kiphinna ahung kipat til lam chun JAC in mipi hetdin Government toh kikah a chepi ding tohgon phabep ana phongdoh in, hinlah hichu ajing ma ma in ana ladoh tai. Hiche a kisei phabep lah-a hetthei khat chu Government kom’a compensation (ex-gratia) leh adg. thu ana hi. Hichu deilou bang in ina um uvin, ahin October 30-31 sung a JAC meeting resolution hochu ivet leh akipatlam a chepi ding tia ana phondoh toh chun ahung kikheh behseh poi. Ajeh chun Centre government toh kihou ngah a State Government toh joh kihou tahding ti ahung hitai.

October kipat lam chun Thuso ho’a Kuki Inpi Manipur (KIM) chu JAC, Hmar Inpui, Zomi Council, Kuki Inpi Churachandpur, chule Tribe Level a kiloikhom na jousen Government toh kihou din ngense na lhingset anei tauve tin ahung kisei in, hitoh kilhon chun KIM in State Government toh kihouna ahin neipan tan ahi. Hinlah lungdon umtah chu JAC, Thadou Inpi, chule organisation dang dang hon meeting a jaolou ahidan’u ahin phongjal tauvin, KIM in State government toh kihouna (negotiation) ana nei chu mohseh asoh doh tai. Hiphat chun KIM in jong KIC, ZC, HI, chule JAC hochu mopohna ana nung pehdoh tan ahi. Ahin KIM in State Government toh kihouna dia condition ana peh ho chu October 30-31 nikho resolution toh chun ahung kibang thou thou kit ngal tai.

Hitobang a KIM mopohna ana kipehdoh-a, athiho October 6 masang a vuidoh ding tithu ahung kisei chun mipi tampi ana lung phamo tan, athiho Insung mite jeng injong hatah in alungkimlou nau ana phongdoh tauve. Hiphat chun tuchung kiphinna a pan nasatah a hinla Zomi Council President Pu LB Sona chun ‘moral ground’ in themmo ana kichan in haina lekha (resignation letter) ana pelut tan ahi. Hichun ama khel din Pu Vungsuanthang chu ZC President (i/c) din lhendoh ana hin, ahin ama jong Lhakhat lhinglou lai in ana hai kittan ahileh Zomi Council chu phat chomkhat a din ana kisumang tan; lamkai teni jong Paite Tribe Council in suspend ana bol lhon tan ahi.

Thingnoi lam a seidin UPF leh KNO in Political Demand kibang neiding ti kinoptona ana neitan, Demand kibol ding chu “State” hiding tobang in ana kisei-e. Hinlah hiche jong chu State pilhing ham, ahilouleh ‘state within state’ hiding ham ti akihe tapoi. Chuleh amin ipi kisah hitam jong het ahi naipoi. Hiche sang chun ZRO President pa leh Zomi Numei Pawl kikah a kihet themlou na ahung sohdoh khatan, ZRO President pa Inn kisen ana kihal lha tan ahi.

Boina meipi bang ajin laitah a ZRO leh ZC sungthu a ‘internal conflict’ ahung sodoh khah chu vangset umtah khat ahi. Ajehchu tuchung kiphin na chu ZC (or PTC) panmun lientah ana um ahi. Hinlah hiche internal issue hi aphalam a ahung kiheidoh ding hi mipi jouse kinepna ahiye.

MLA HO DINMUN

Tuchung ikiphin nau ahung kipat a pat mipi in alhangsap chu tribal MLA jouse ki-resign hen tichu ahi. Hinlah NPF MLA-4 tilou adang khatcha in haina lekha ana pelut poi. Hijeh chun Paite (YPA-GHQ) hon Pu Phungzathang Tonsing leh Pu Vungzagin Valte chu ‘boycott’ ana bol tan, Tangkhul (TNL) hon jong Congress MLA Victor Keishing leh MK Preshaw Shimray chu Tangkhul Nam akon ana paidoh tauve. Hitobang ma chun Hmar thingnoi HNA hon Pu Chaltonlien Amo chu ahinkho liem holeh akitongkha hokom’a ngaidam akithum a MLA hina akon mipi hetthei tah a resign kibol din thupeh ana nei kit tauve. MLA dang hovang hiche article kisut chan hin imacha aum be poi. MLA hohin ‘ka-Inn ka-lou nahal chai jou nung kisen uva ki-resign ding a neisei nalai uham’ tia agel’u ahi dem?

Hiche sang hin Sadar Hills sung’a MLA thum hon October kichai masang a Sadar Hills phondoh ahilou leh November 2 nikho leh haina lekha (resignation letter) kapehlut diu ahitai tin ana phongdoh tauve. Hitoh kilhon chun Sadar Hills sung’a CSO hon District Demand thu ahin samphong jap uvin, Sadar Hills ADC member (MDC) hon jong tosot na vetsah nan toumun kiphin ana bol uve. Hiche hi ivet leh CCpur thilsoh a kon MLA jouse resign kibolding a mipi kholhangsap chun Sadar Hills MLA ho ahop phahlou abang tan ahi.

Alangkhat a Delhi a alien-alal ho kimupi dia kalsong JAC leh Coordination Committee ATSUM (CCA) ho ahung kile gam tauvin, thuchaina umthei lou dan in akilang nalaiye. Manipur Tribal Forum, Delhi (MTFD) hon jong President jaona in alien-alal tampi ana kimupi uvin, munchom chom a um sopi hon jong ama-ama hitheina khambep cheh in India Government chu pressure ana pe uve. Hitiho jouse jal a hi tuchan a Meilhei te ILP Bill-3 chu pending a kikoi hiding in ginchat ahi.

NAGATE DINMUN LEH NSCN-IM RECRUITMENT

CCpur a boina ahung sodoh chun chenkhompi Naga hon hatah in tosot na ana nei uve. UNC lamkai na in kiloikhomna tampi in thigal-na ana nei uvin, ‘Tribal Martyr’ ho opna ahung bol uvin ahi. Hinlah hiche issue toh kisai a Bandh/Strike akou teng ule Eimi lang ho toh kihoutoh na aum ji pon, CSO khat le ni in atosot tilou in kilungtoh tah a iki thokhom nau aum kha poi. Athah beh in ‘10-Days Economic Blockade’ ahin koukit uvin, hiche jong hi Eimi ho toh kihoutoh na umlou dan in akilang’e.

Hicheho sang hin Naga te hin August 3, 2015 nikho a NSCN-IM leh Government of India in ana kai “Naga Peace Accord” joh akhohsah dan uvin akilang tan; hiche kikah lah ahin NSCN-IM in point-50 ‘Charter of Demand’ Centre kom’a ana pelut kit tauvin ahi.

Hiche kalval jong hin Naga Peace Accord (Framework Agreement) sign ana boljou uchun lhangphong tah in NSCN-IM in recruitment drive ahin chepi in; news report phabep achun mi-400 vel athah beh in alalut tauve tin ana sei uve. Hetding khat chu Nagaland Governor P.B. Acharya chun NSCN-IM sepai 4000 (sang-li) vel hohi Peace Accord (Final) soi akikai teng Naga Regiment (ahilou leh IRB) a kilalut diu ahi tia ana phondoh ahi. Hiche hin khangdong ijat hamkhat sepai panding thanop jeh a NSCN-IM ana jopsah hidin ginchat ahi.

Hitia open tah a NSCN-IM in Peace Accord kikai jou’a recruitment drive ahin bol chu Centre in hatah in ana jahda’n, hinlah NSCN-IM luboh hochun hiche recruitment drive hi phatseh a hung kibol ahin, tuchung sehseh ahipoi; chule koima cha hunam in aki jaosah pon, ajaonom hochu ama dei (freewill) a bou jao ahiuve tin suhtheng na ana nei uve. Phat chomkhat jouchun News Report phabep in athah beh a NSCN-IM a lut chu Manipur a kon chapang khangdong mi-200 vel ahin, NSCN-IM Camp munchom chom ah training abol uve tin ana sodoh kit-e. Hiche toh kisai a ginchat umtah thu kija khatchun Manipur a pat NSCN-IM jaodia ana kalsong hochu atamlang Naga hijong leh Eimi phabeppi jong ajao’e tihi ahi. Adeh in tribe neolang (Kom Rem) ho phabeppi leh Eipao (Thadou-Kuki) pao tho phachom pi jong ajao’e tin akisei’e.

Hiche hi atah ahiding leh Nam lamkai ho ding’a jachat umtah, chule mipi ho ding’a jong pohnat umtah ahi. Detmo umtah khatchu NSCN-IM a pang ding’a che atamjo hi NSCN-IM hon Peace Accord ahin kai (sign) jou teng ule Cadre ho Army leh IRB a hung kihei lut ding ahi ti kinepna jeh ahi pen’e. Hinlah NSCN-IM Cadre ho hi Army leh IRB a hung kilalut mong ding hinam tihi koima aseithei ding aum naipoi. Hijong leh Framework Agreement sign ana kikai chu Final Match hung umtei ding ahi tia atam lang in atahsan ahi. Hitobang dinmun boitah a idin lai uva sopi pasal ijat hamkhat NSCN-IM a lutdia acheu thu kisei hi atah ahi leh hoitah a iki gelphat diu deisah ahi. Chule Centre Interlocutor RN Ravi November 3-4 sung’a anivei channa dia Manipur ahung vil hin ichangei hamkhat a NSCN-IM toh kikah Peace Talk ahin suhjang ding tahsan ahi.

MEILHEI HO PANLAH DAN

ILP thu a Manipur hatah a aboinung in Meilhei hohin Bill-3 hon thinglhang miho atoh khah nading aum poi tin ana lhangsap uve. Chief Minister pa jeng jong Delhi jon in ana vaikon in, Union Home Minister (Rajnath Singh) jaonan alien-alal tampi aga kimupi’e. Langkhat ah, Union Home Ministry in Ashok Prasad [Secretary (Internal Security)] chu Special Envoy ding in ahin sol in, atahsa tah-in CCpur ahung vil in, JAC, Apex Body thum (KIC, ZC, HI), chule UNC akon in memorandum pehlut ana hi.

Hitichun thinglhang mihon Bill-3 ana doudal uvin, Meilhei hon la thinglhang miho atohkhah nading aum poi tin ana pang chahkheh jeng uve. Hinlah phat ahung chal in alang-alang in kinielna ahung khenem jep jep tan; Apolam ahung thip jepjep phatchun Meilhei hon muntin ah Consultation Meeting, Public Discussion, chule Workshop/Seminar ho ahin bol jom peh tauve. Meilhei CSO poimo cheh UCM, AMUCO chule CCSK (Committee of Civil Societies, Kangleipak) ho lamkai nan Manipur a “Common Future” neiding ti thupi mangchan tuchan hin Campaign amachal jing nalai’e. Thulamleng kija dan in, Meilhei hohin aguh in jong lunggel seikhomna anei jing uvin, lunggel kibahlou naho jong toukhom in aseilha jiuve akiti. (Eiho vang chu lunggel kibahlou na neokhat aum jong leh muntin a kithethang le jeng ji ahi. Meilhei hovang achingthei jep tauve.)

Lhangphong a Meilhei CSO, Pressure Group, chule mipi in thinglhang miho douna a lunggel anei jing lai uvin, Myanmar (Burma) lam’a um Meilhei thingnoi ho jong Manipur Thinglhanggam toupha ding lunggel anei jing uve tin akisei kit-e. Hiche hi Army ho le Eimi Thingnoi (adeh a Myanmar toh gamgi a umhon) atin jing’u dan in jong akihe. October 25 nikho a UNLF hon Satang (Chandel) kom’a AR khat ana kaplih uva, PLA hon ajing nikho mama a Khoikai (Ukhrul) kom’a AR JCO khat ahin kaplih pai kit uchun thulamleng hi adihna avetsah-e. (Lhamasa lam’a Paraolon Ambush chungchang article a jong chun thingnoi ho chaloh dan phabeppi ina sei tauve).

Hitobang a phaicham a pat chanvou ei-kilahpeh got a, thingnoi hon thinglhang-gam toupha ding agot jing lai uva eiho kikah factional clash aum jing hi pohnat umtah khatchu ahi. Achesa Lha-ni sung ahin Army hon atha phabep ana um in, eiho le eiho kikah a kithato najong phabep ana umtai. Chujong leh Naga ho la tahsan tah-a kivoppi thei ding dinmun ahi pon, hitobang dinmun a idin lai uhin eiho jengjong dinkhat in iding thei hihlai uve.

THUCHAI NA

Hiche Article ahin lunggel phachom pi ahung kitah lang tan, hiche a kon hin Nampi Phatvet in kive cheh leohen deisah ahi. KHOHUI hin Nampi focus akibol jing in, Nam Lamkai ho tampi KHOHUI Insung mite simthei din Interview ana kibol tai.

Hiche toh kilhon chun tuchung hin KHOHUI Insung mite jousen Nampi dinmun hi akhoh laitah khat a ding ihiuve ti igeldoh diu pha akisai. Nampi ding a ahinkho ana phal sopi ho Luongdamsa jong aum nalai in, Lha-ni ihung kiphin nung uvin JAC hon Manipur Government toh kihou nading tohgon ahin pan tan, thilpha ahi tin gel sohkei ute. Deimo lheh jong leuhen tu-tadi a chu Manipur Government chu eiho chung’a Vaihom ahijeh in donda thei ahipoi. Hinlah JAC in thuphon ana nei bang’a Eiho Chondan toh kitoh a Hiemkham, Toltheh, Luongman, Chamna Thu, chule adg. abol teidiu ngai ahi. Ahimong’a aum talou ho Jaana sangtah pum’a Pathen deilam a koidoh ding chu eiho jouse mopohna khat jong ahi.

Alangkhat a Nagate leh Meilhei te kikah a ding ihiuvin; alangkhat a Centre leh Manipur Government kikah a ding ihi kit uve. Hijeh hin ‘decision’ (lunggel) chingthei tah a ilah uva, khonung changei ding ivet diu akhoh mama tai. Chule Lamkai cheng in thulhuh ahin siem teng mipi jousen tosot cheh tahding jong deisah ahi. Lamkai hon ipi seijong leh mipi tosotna bei a phachom lou ahi. Jatdang te toh kidin te jing ihi jeh uvin chingthei tah in pan lakhom’u hite. Aneopen in Newspaper lah dung’a Correspondent/Reporter honjong Nampi sukha thei thu ho chingthei deu’a iso ji diu deisah ahi. Hueiyen Lanpao (30.10.2015) a hung kisei 48 Hour Bandh le Churachandpur apat Mizoram kijopmat na lampi ho semding hung kime tha chu Phaicham mihon asim teng lunggel hoimo tah hung chomdoh thei ahi. Idinmun’u itobang (critical) ahi dan tampi ihin seidoh tauvin, Nampi a ding’a mijouse dinkhat ihi nadiuva pan ilah cheh tahdiu kinepna pum in, hiche article hung kijihna a jihkhel (ngaidathei) aum khah leh ngaidam ahung kithum’e.***

(Article written for KHOHUI Magazine on 1-11-2015)