Exam poimo dan, chule Exam kigot ding dan

Amasapen in hitobang TPO EduCom in amasapen dia agon kin-gon mantamtah, ‘One Day Education Symposium’, a resource person ding a ngailut umtah Ute-Pate ho deisahna kachan jeh in achung cheh uva kipathu seijoulou kaphong’e. Keima seiding a ei-kipe topic chu “Exam Technique” (Exam a dia kigon ding dan) ahi in, hijongleh exam technique sang in exam poimo dan joh focus masat ding kadeisah-e.

Exam kigot ding dan, ahilou leh Exam Technique, akiti teng seithei thil tampi aum’e. Chuleh hiche chungchang a’hin mijouse lunggel jong kibang ponte. Ajeh chu mihem akibah lou bang’a lunggel jong kibang sohkei lou ahi. Alang khat ah, exam pattern hi aphat phat in akikhel jing in, tua pat kum-10 masang (kei HSLC/HSE exam bollai) pattern toh tu 2015-16 exam pattern hatah in akikhel tai. Among a exam technique (exam a dia kigon ding dan) hi ikai na cheh-u school a Oja (Teacher) tehon hoitah a eina hiltei diu ahi tah jeh in achaina lam joh in ana sei-u hite.

Exam poimodan, chule Mark tammu-lou akhoh dan

Matric (HSLC) Exam hi simlai khat career sung’a exam poimo pen khat ahibang in Class-XII exam jong hi stage khat kal nading mai mai ahi poi. Hijeh hin anigel in apoimo cheh-e. Ajeh chu hiche exam teni a na-mark mujat (ahilou leh na-grade score jat) chu nahinkho a kikhel thei talou ding, chule na-mark/na-grade chun ichan hamkhat a na-masang hinkho (career) decide ahin bol ding ahi. Exam a mark tammu jouse lolhing a; mark lhomcha cha muho lolhinglou ahi dehpoi. Hinlah mark tammu hi (lhomcha mu sang in) aphatchom na tampi aum’e.

Exam a mark tammu phatchomna point seithei tampi lah-a themkhat ana veu hite:

1. Confidence neina ahi dan: Exam a mark lhomcha muho sang in sangtah muhon alhangpi in hinkho sung’a lunglietna (confidence) aneijo jiuve. Loi-le-pai kah jeng a jong hinkho Mandan anomchom in, seiphat-pachat channa khat jong ahi. Lolhin na ding’in kisonna nei hi apoimo ma ma jeng in, hijeh hin exam ho a mark ahithei chan’a sangmu ding tup ding ahi.

2. Entrance exam a ding: Class-X/XII hinchai jouse chu, line chom’a cheding ahingal lou leh, aban simbe nading school/college ahin kingaito tei ding ahi. Hiche nading ahin percentage apoimo lheh ji’e. School/College phabep vang chu percentage kivelou maithei ahi nai; hinlah institution hoidom jouse hi atam lang percentage in akive tei ji. Hitobang dinmun ahi teng simlai khat chu lekha themlheh jong leh percentage lhinlou jeh mai mai a adeina mun a themjil ajop nading chance kikhapeh thei ahi.

Vetsahna: Class-X result ahung kiphon teng Manipur sung’a Higher Secondary simnathei school hon percentage sangtah tah muho ding facility/scholarship tampi ahin pejiuve. Adeh in Rank/Position holder ho vang chun adeina pen pen akilhen’a, sumlepai lut louhel a nomtah a Class-XI ajop thei, scholarship changei jong amuthei hinalai ahi. Chujong leh Class-XII chai a India munchom chom a College kainom hochun percentage hi poimo ahinsah dehset jiu ahi. India sung a kihahet pen Delhi University (DU) noija College hoidom’a kainom ho deh deh chu Class-XII percentage hoitah amu’u hung ngai ji ahi. College abang loi a chu 98-99% cheng ngaiji ahi. Hijeh hin Class-X/XII chai a College hoidom khat a aban simbe nading mai mai in jong percentage hi apoimo’e.

3. Job (Service): BA/MA (Graduation or Post-Graduation) hinchai a job (service) holho din jong percentage poimo na tah tah ana umji’e. Adeh in percentage hi Manipur ah apoimo dehset-e.

Vetsahna: Tuchung’a MPSC in conduct abol Assistant Professor (College Oja) Exam a’hin 50% hi mark (marksheet) in akive in; 50% hi interview in akive-e. Chujong leh SSA in masang jep-a conduct ana bol natoh phabeppi kikouna ajong chun 80% chu mark in akive in, 20% bou interview (viva-voce) in akive-e. Kumphabep masang 2010-11 vel jong chun Primary Oja tampi ana kila in; hiche ho chu written le interview imacha umlou in mark basis bou in ana lheng uve. Hitobang Exam ho a’hi candidate khatchu lekha themlheh jong leh percentage hoilou ahikhah leh alolhin nading chance nemcha ahi. Ahin Interview bol hoi behseh hihjong leh percentage hoi ahi leh amu nathei chance um ahi.

4. Higher Studies a ding: BA/MA chaijou a higher studies bolnom ho ding in jong percentage hi apoimo kit nalaiye. Percentage hi ‘hijat beh mutei angaije’ tihi (University jouse kibang lou ahijeh in) kiseithei hihjong leh asan chan a aphatna um ahi. Aneopen a seidin NET/JRF exam bol nading hihen, Ph.D entrance test leh University Oja (Professor) pan nading hijongleh percentage sangmu hodin aphatna ana umteiji’e.

Hiche ho jouse hi ivet leh Exam a mark tammu ding aphatchom na hi Exam kichai a kipa-golnop bolding sehseh khu ahipon; ihinkho sung’a mitdohna jong hithei ahi tihi akicheh-e. Lekha bolthei behsehlou khat jong chu percentage ahoijeh a service akimu’a ahinkho a nomtah a hingthei ahi. Ahilou jong leh higher study bolna ding a College/University hoitah akimu a, khonung changei a mitdoh na a aneithei ahikit-e.

Ahin Civil Service, ahilouleh central service ho tobang bolnom hodin percentage sangtah gamukhel angaipoi. Ajeh chu ‘pass’ pou pou hithei jeng ahi. Hinlah  hitobang ho jeng ajong hin percentage hoiho a din asetna sang in aphatna ana umjo ji nalaije. Adeh in document verification leh Interview dung’a mopohna neiho ‘impress’ bolna a phatah ahi.

Akhuti a ahileh ipidia lekhasim ithaset diu ham? Tua phat chomcha lekha hatah a isim uva percentage hoitah imu uva ahileh hiche sehseh jong chun ei-mitdoh sah thei’u ahijeh in thaset nathei ahipoi. Lekha simnomlou ina umkhah uva ahijong leh mithase hi Pathen in adei pon, mihem jeng injong adei poi tihi igeldoh diu deisah ahi. Pathen in ahatmo chom ding leh alhasam chom ding a eisem’u ahilou vang in imalam jouse in mi-nung del ihi nalai uve. Hiche dinmun hi ahung kikhel’a mi-nung iphah nadiu hi khangdong (adeh-a simlai) ho i-mopohnau lienpen ahi.

Exam technique (Exam kigot ding dan)

Tuhin Exam a ding’a serious tah a hung kigo hon syllabus asimchai a exam a ding mong mong’a ‘revision’ abolpan ding ahi tai. Chuleh lekha khohsah jouse ding in Christmas leh New Year, ahilou leh thil dang dang ho sang in Exam joh poimo jo inte. Ahin mi ijat hamkhat vang chu Exam ding jong khohsah lou’a tuchan a nomtah a umnalai ding ahi. Hitobang chu i-umkhah uleh hoitah a iki gel uva ‘hitia hi moh umthei kahipoi’ tia ingaito cheh diu kanom’e. Tuhin exam nading lhani-lhathum tobang bou aum tan, hiche sung beh a hi thohhat tah a pan ilah diu deisah ahi.

Hijeh chun tua pat beh-a tomngai tah a pan lanom hodin anoija hin exam a kigot ding dan point phabep ana ve kit-u hite. Mark (sangtah hilou’a) igel bangtah-u imu nom uleh tuni ma ma iki gellhah diu angai tai.

1. Routine (Time-Table): ‘Routine’ (Time-Table) kisem loulai nahi leh agangthei pen (tunilhah mama in) kisem in lang phatah a jui ding gel in. Routine isem teng subject dungjui leh Chapter alet-aneo dungjui a phat hoptoh ding ahi. Topic dungjui cheh in nikho le phat homtoh lechun pungkah khat jengjong moh mansah ngam tapon nate.

2. Asim ding dan: Lekha sim iki pat ding teng eima lunglud najep subject/topic hoa kipat ding aphai. Chule isimchaisa hochu revise bol a, ajih kithemchuh ding, ‘notes’ jong kisem ding ahi.

3. Rest (kicholdo phat): Lekha seh seh ngaito a itahsa ding gelkhoh lou jongchu thilpha ahipoi. Hijeh chun Lekha sim dahkal khat (1 hour) sung hin 10 minute tobang kichol ji in. Hinlah Exam nading jong phat naicha ahitah jeh in nikhat sung’a lekhasim phat hi 15 hour noilam ahipou leh tahsa adin (alhasam mong mong ho tilou) boina umsam ponte!

4. Lekha sim phat: Lekha itih phat a simding ham tihi eima deidei ahi. Jingkah lam a ihetthei jepleh jingkah lam’a hasim a, nilhah lam’a ihetthei jepleh nilhah lam’a hasim jep thei ahi. Tuhi sun le jaan khenlou a iphat nei chasun a lekha sim nading phat ahi tai.

5. Phat mansah louding: Tuhi phat masah nading phat, ahilou leh time-pass bolphat ahi tapoi. Kichol manlou a lekha sim sim jeng ding tina ahi deh pon, i-phat atamthei pen a lekha simna a pehding itiu ahijoi. Avel in seikit leu hen nikhat sung’a pung-15 chan lekha nasim jeh in natahsa-nalhoh boisam ponte.

6. Loi-le-pai toh kivop: Exam phat naicha a um ahitah jeh in loi-le-pai ikhohsah tah tah hojong (i-lekha sim suboi thei ding ahileh) phat chomkhat kigamlhat pi ding ahi tai. I-dongma ngaitah jeng jong exam kichai kah-a kimupida phot jeng ding ahi. Exam laitah a eihung suboi jing thei loi-le-pai chu dalha jong lechun naman deh louding ahi.

7. Extensive leh Intensive study: Exam kon a topic tamtah tah sim ding hi thilpha ahi tapoi. Ajeh chu koi hetthei tah sang’a confuse kiche lo thei ahi. Hijeh chun exam a hung kidong thei ding topic/question hobou kilhen doh a extensive hilou’a intensive study joh bolphat ahi tai.

8. Exam Strategy: Exam khat bolding ihi tahleh ‘Strategy’ phate a kisem angaiye. Hiche ho lah-a apoimo tah khatchu, Past Question vetding hi ahi. Achesa past question ho iki koi sohkei diu ahi tan, kum-10 tobang question hochu hoitah in ve lechun tukum a kidong sa ho akumkit teng kiveldoh behseh ji talou ahi. Hitobang tukum a kidongsa hochu akihet nakhat (mark) sem’a simda thei ahi tai. Chule kumkhat-kumni kikalchuh a avel vel a kidong jong um ahijeh in hitobang ahung kiveldoh nathei topic hochu hoitah a simding aphai. Hiche hi boltei tei ding tina ahi pon, hitia hi eima dia aphapen pen ding’a strategy kisem ding tina ahijoi. Guide bolthei ding hoitah neiho leh kumbul apat hoitah a lekha hinsim hodia vang boina hinaisai talou ding ahi.

Chujong leh insungmi hihen gamchommi hijong leh lekhasim suboi thei natoh ho jouse dalhah a lekha bou boipi phat ahi tai. Asun-ajaan a lekha bou naboipi jeh in koimacha lunghang ponte. Na-insungmi, na-sopi ho kipahjo diu ahi. (Hinlah natoh ding aumteng lekha simding kahi natia, free a naum teng lekha simlou a naum jingkei leh michavai kahi ti kigeldoh in lang athah beh in khongaisot lou in kipan kit jeng in; ajeh chu kinomsot nading phat um talou ahi.)

Point tampi umjong leh athupi dom phabeppi ihin sei tauvin, adang tampi jong umnalai inte. Ihinsei utoh kilhon in kumkit a CBSE, COHSEM, BOSEM, chule Board dang dang a exam bolding jousen sangtah a lolhin na ineithei cheh nading uvin achung a kipe point hohi hoitah in veu hitin, hiche kalval a hoijo cheh din kigo-u hite. Namsung, Society sung, chule i-Insung uhi ivet leh khangdong simlai hohi athase thei leh amimo thei ihi pouve. Hijeh chun khonung chan’a lolhin na sangtah tah ihin neithei cheh nading uvin hapan in pang ute. Khonung ding galdot pum’a kihambol tah-a pan lahding chu thilnom hilou maithei ahi; hijong leh tua phat chomkhat kathohgim nahi khonung changei a ding ahi ti geldoh a thohhat tah a panding ahi. Kiham bol kal a phading aum poi. Hijeh a hi thuchih in ‘Hard-work has no substitute’ ati ahi. Pathen in Insung, adeh in simlai ho phattheina chamkim pe tahen.

Achainan, ibonchauvin Christmas leh New Year ‘chibai’ jong kahin bol’uve!.

(*Hiche article hi TPO EduCom in December 19, 2015 nikho a Retreat Hall, Mantripukhri mun’a agon ‘One Day Education Symposium’ a simdoh ding’a kijih ahi.)